کھلاڑیوں کو سہولیات دینے سے ہاکی کوفروغ ملے گا،حنیف خان

اسلام آباد(شوریٰ نیوز)کھلاڑیوں کو سہولیات دینے سے ہاکی کوفروغ ملے گا،پاکستان کی ٹیم کا عالمی جونیئر کپ کیلئے کوالیفائی کرنا کارنامہ ہے،جونئیرہاکی ایشیاکپ ٹورنامنٹ میں دوسری پوزیشن کے ساتھ سلور میڈل حاصل کرنے والی پاکستانی ٹیم کے کوچ و منیجر اولمپیئن حنیف خان نے کہا ہے کہ ہماری نگاہیں عالمی کپ پر مرکوز ہیں، اگر وسائل اور سہولیات میسر آئیں تو کھلاڑی قوم کو مایوس نہیں کریں گے۔عمان کے شہر صلالہ میں منعقدہ جونیئر ایشیا کپ میں شرکت کے بعد وطن واپسی پر اظہار خیال کرتے ہوئے سابق قومی کپتان اولمپئن حنیف خان نے کہا کہ پاکستان کا سیمی فائنل تک رسائی کے بعد عالمی جونیئر کپ کیلئے کوالیفائی کرنا اہم کارنامہ ہے، اس سے ملک میں نہ صرف ہاکی کو دوام ملے گا بلکہ قومی کھیل کی ترقی کے لیے راہیں بھی کھل جائیں گی۔حنیف خان نے کہا کہ محدود وقت میں کم وسائل کے ساتھ ہمارے کھلاڑیوں نے قومی جذبے کے ساتھ اچھی طرح تیاری کی اور بھرپور کارکردگی دکھائی، پاکستان کے پاس بہترین ٹیلنٹ موجود ہے، ٹورنامنٹ میں تمام کھلاڑیوں نے اچھے کھیل کا مظاہرہ کیا، خاص طور پر ٹاپ اسکور عبدالرحمن کی کارکردگی بہت عمدہ رہی۔