اسلام آباد(شوریٰ نیوز)وزیر اعظم شہبا زشریف نے توشہ خانہ میں پڑے تمام تحائف نیلام کرنے اوریہ آمدنی یتیم اور بے سہارا بچے بچیوں کو دینے کا اعلان کیا ہے۔ان خیالات کا اظہار انہوں نے پی بی اے، اے پی این ایس اور سی پی این اے کے وفود سے ملاقات میں گفتگو کرتے ہوئے کیا۔ وزیراعظم نے توشہ خانہ میں پڑے تمام تحائف نیلام کرنے کا اعلان کیا اور کہا کہ اس کی آمدنی یتیم اور بے سہارا بچے بچیوں کو دی جائے گی، میرا خیال ہے کہ یہ ان کا حق ہے۔انہوں نے کہاکہ جب اقتدار ملا تو حالات کی سنگینی کا اندازہ نہیں تھا۔ ان کاکہنا تھا کہ دوسروں کو چور کہنے والا آج خود جیل میں ہے۔ بدقسمتی سے چار سالہ دور میں ملک کے ساتھ زیادتی کی گئی۔وزیر اعظم شہباز شریف نے مزید کہاکہ سابق دور میں تکبر اور غرور نے ملک کو گھیرا ہوا تھا۔دوست ممالک کے ساتھ گزشتہ چار سال میں تعلقات کو خراب کیا گیا۔معاشرے میں اتنازہر گھول دیا گیا کہ صاف کرنا مشکل ہے۔گزشتہ 15ماہ میں دوست ممالک کے ساتھ تعلقات کو بحال کیا۔انہوں نے مزید کہاکہ چور ڈاکو کے بیانئے نے ملک میں ہر طرف تباہی پھیلا دی۔سیلاب، مہنگائی اور معاشی حالات جیسے مسائل کا سامنا کرنا پڑا۔اجتماعی کاوشوں سے ملک کو دوبارہ راستے پر لانا ہوگا۔ دوست ممالک سے اربوں روپے کی سرمایہ کاری آ رہی ہے اسمبلی تحلیل کرنے کی سمری کل صدر مملکت کو بھیج دیں گے ۔