علامہ شہنشاہ نقوی کے خلاف زبان درازی ہرگز قبول نہیں ،پشاور میں شرانگیز ریلی کی مذمت کرتے ہیں، شیخ ناصری

نمائندہ آیت اللہ العظمٰی شیخ محمد الیعقوبی(دام ظلہ) و سربراہ شوریٰ علمائے جعفریہ پاکستان علامہ شیخ ہادی حسین ناصری نے کہا ہے کہ یقیناً یہ افسوس ناک امر ہے کہ پاکستان میں بعض فتنے انگیز عناصر اُمت مسلمہ اور خود پاکستان کو درپیش سنگین مسائل سے دانستہ چشم پوشی اختیار کرتے ہوئے، اپنے حملوں کا رخ اہل تشیع کے جلیل القدر علمائے کرام کی جانب موڑ دیتے ہیں،علمائے کرام کی توہین ہرگز قبول نہیں۔

علامہ شیخ ہادی حسین ناصری نے کہا ہے کہہم پشاور میں ہونے والی اُس ناپاک ریلی کی شدید الفاظ میں مذمت کرتے ہیں، جس میں علامہ سید شہنشاہ حسین نقوی جیسے ممتاز شیعہ عالم دین کے خلاف زبان درازی کی گئی۔ یہ ایک خطرناک رجحان ہے جو نہ صرف مذہبی ہم آہنگی کے لیے نقصان دہ ہے بلکہ ملک کے امن و استحکام کو بھی خطرے میں ڈال سکتا ہے۔

علامہ شیخ ہادی حسین ناصری نے کہا ہے کہہم حکومتِ خیبر پختونخوا سے سوال کرتے ہیں کہ ایسی شرانگیز ریلی کی اجازت کس بنیاد پر دی گئی؟ کیا یہ سمجھا جائے کہ صوبائی حکومت خود اس فتنہ انگیزی کی شریک ہے یا دانستہ خاموش تماشائی بنی بیٹھی ہے؟ہم واضح کرتے ہیں کہ علامہ سید شہنشاہ نقوی ہو یا کوئی اور شیعہ عالم، اُن کے خلاف زبان درازی دراصل تشیع کے خلاف حملہ ہے، اور ہم ہرگز ایسے کسی حملے کو برداشت نہیں کریں گے، نہ ہی اس پر خاموشی اختیار کی جائے گی۔

علامہ شیخ ہادی حسین ناصری نے کہا ہے کہہم پاکستان کے تمام سیکیورٹی اور انتظامی اداروں سے پُرزور مطالبہ کرتے ہیں کہ وہ اس سنگین واقعے کا فوری نوٹس لیں، ذمہ دار عناصر کو قانون کے کٹہرے میں لایا جائے اور ملک میں فرقہ وارانہ ہم آہنگی کو ہر صورت میں محفوظ بنایا جائے۔