محکمہ موسمیات کا کہنا ہے کہ افغانستان سے مغربی سسٹم آج ملک میں داخل ہوگا جس کے باعث شمالی بلوچستان میں بارش اور برفباری کا امکان ہے۔
شدید سردی کی لپیٹ میں آئے علاقوں میں درجہ حرارت مزید نیچے جانے کا امکان ہے جبکہ سائبیرین ہواؤں کی رفتار میں اضافے کے باعث آج سے کراچی میں بھی سردی کی شدت بڑھ سکتی ہے۔
آج کراچی کے مضافتی علاقوں میں درجہ حرارت 9 سے 10 ڈگری سینٹی گریڈ کے درمیان رہنے کا امکان ہے جبکہ شہر کا فضائی معیار آج بھی متاثر رہا ہے۔
کراچی میں آئندہ 24 گھنٹوں کے دوران موسم خشک اور رات سرد رہنے کا امکان ہے جبکہ گزشتہ 24 گھنٹوں میں کم سے کم درجہ حرارت 13.5 ڈگری سینٹی گریڈ ریکارڈ کیا گیا ہے۔
محکمہ موسمیات کے مطابق آج دن کے اوقات میں ہوائیں 18 سے 25 کلومیٹر فی گھنٹہ کی رفتار سے چل سکتی ہیں جبکہ سائیبیرین ہواؤں کی رفتار میں اضافے کے باعث شہر میں سردی کی شدت میں بھی اضافے کا امکان ہے۔
آلودہ ترین شہروں کی فہرست میں کراچی آج پانچویں نمبر پر رہا جبکہ ائیر کوالٹی انڈیکس 182 ریکارڈ کی گئی، سندھ، پنجاب اور خیبرپختونخوا کے میدانی علاقوں میں آج بھی شدید دھند کا راج رہے گا۔
شدید دھند کے باعث ملک کے مختلف ائیرپورٹس پر 22 ملکی و غیرملکی پروازیں منسوخ کردی گئی ہیں اور متعدد تاخیر کا شکار ہیں جبکہ اتوار کے روز بھی 35 پروازیں منسوخ ہوئیں۔
ترجمان موٹرویز پولیس کے مطابق موٹرویز ایم 1 کو پشاور سے اسلام آباد تک ٹریفک کیلئے بند کردیا گیا ہے جبکہ موٹرویز ایم 2 کو ٹھوکر نیازبیگ سے ہرن مینار تک اور موٹرویز ایم 3 کو فیض پور سے درخانہ تک بند کیا گیا ہے۔