پاکستان تحریک انصاف کے جنرل باڈی اجلاس میں ایک ہفتے کے دوران پارٹی الیکشن کرانے کے عزم کا اظہار کیا گیا ہے۔
پی ٹی آئی کی جانب سے اسلام آباد سمیت چاروں صوبائی دارالحکومتوں میں ہونے والے پارٹی کے جنرل باڈی اجلاس میں انٹراپارٹی انتخابات کیلئے رؤف حسن کو تحریک انصاف کا وفاقی چیف الیکشن کمشنر مقرر کیا گیا۔
پی ٹی آئی کے چیف آرگنائزر عمر ایوب کی جانب سے حسن رؤف کا نوٹیفکیشن جاری کردیا گیا، تقرری پارٹی کے جنرل باڈی اجلاس میں کی گئی ہے۔
عمر ایوب نے کہاکہ انٹرا پارٹی الیکشنز کے سلسلے میں وفاقی اور چاروں صوبائی دارالحکومتوں میں بلوائے گئے پی ٹی آئی کے جنرل باڈی اجلاس کے دوران اسلام آباد کے مرکزی دفتر اور کوئٹہ کے دفتر کو پولیس نے گھیرے میں لے لیا تھا۔
پولیس کی جانب سے ہماری پارٹی کے ارکان کو پارٹی دفتر کے احاطے تک رسائی سے روکا گیا، پولیس کی کارروائی سپریم کورٹ کے احکامات کی براہ راست خلاف ورزی ہے۔
پی ٹی آئی کے راستے میں ہر رکاوٹ کھڑی کی جا رہی ہے تاکہ ہمیں سیاسی جماعت کے طور پر کام کرنے سے روکا جا سکے، ہم پولیس کے اس اقدام کی مذمت کرتے ہیں اور عدلیہ سے فوری نوٹس لینے کا مطالبہ کرتے ہیں۔