میرٹ پر فیصلہ ہوا تو جلد عمران خان پاکستان کے وزیر اعظم ہونگے،اسد قیصر

0 153

پاکستان تحریک انصاف کے رہنما اور سابق اسپیکر قومی اسمبلی اسد قیصر نے کہا کہ میرٹ پر فیصلہ ہوا تو جلد بانی چیئرمین عمران خان پاکستان کے وزیر اعظم ہوں گے۔

انہوں نےاڈیالہ جیل راولپنڈی کے باہر میڈیا سے گفتگو کرتے ہوئے کہا کہ الیکشن کمیشن نے تاریخ کے بدترین الیکشن کرائے ہیں، کراچی اور پنجاب میں ہمارا مینڈیٹ چوری ہوا ہے۔

ہم لوگ عوام میں جائیں گے اور قانونی جنگ بھی ہوگی، کوئی بھی وزیر اعظم، گورنر اور وزیراعلیٰ بننے جا رہا ہے، ہمیں اب بھی عدالتوں سے امید ہے۔

کل عہدوں کی بندر بانٹ کی گئی ہے، مینڈیٹ ان کے پاس ہے نہیں،ن لیگ کے پاس 23 سیٹیں نہیں ہیں ، ان لوگوں کو شرم و حیا اور وقار ہونا چاہیے۔جعلی وزیر اعظم اور کابینہ ہوگی تو ان لوگوں کو کوئی بھی قبول نہیں کرے گا۔

تحریک انصاف کو بوگس طریقے سے باہر رکھا گیا جب کہ پنجاب میں ہمارے 220 اور وفاق میں 180 مینڈیٹ ہیں، شہباز شریف میں اخلاقیات ہو تو شکست تسلیم کریں کہ وہ اقلیت میں ہیں اکثریت میں نہیں ہیں۔ فارم 45 انوکھی دستاویز ہے،ہمیں معلوم ہے کہ جعلی ٹھپے لگائے جارہے ہیں۔

اسلام آباد ہائی کورٹ کی جانب سے بانی چیئرمین سےملنےکی اجازت لی تھی لیکن جیل انتظامیہ نےمجھےکہا کل آئیں، کل بانی پی ٹی آئی سے ملاقات کے لیے پھر آؤں گا۔

کمشنر راولپنڈی کے انکشافات پر جوڈیشل کمیشن بنائیں، ایک اسسٹنٹ کمشنر بھی سامنے آیا ہے، چیف جسٹس کے لیے آئین مقدم ہے تو اس کیس کو دیکھیں۔

پیپلز پارٹی چاہتی ہے ان کے پاس بڑے دفتر آجائیں اور وہ عوام کو بتائیں گے کہ ان سب میں ہم شامل نہیں۔ یہ پی ڈی ایم 2 ہے ان لوگوں نے ملک کو کنگال کیا، یہ لوگ ذہنی طور پر ہارے ہوئے ہیں، میرٹ پر فیصلہ ہوا تو جلد بانی چیئرمین پاکستان کے وزیر اعظم ہوں گے۔

جواب چھوڑیں

آپ کا ای میل ایڈریس شائع نہیں کیا جائے گا.