قائم مقام صدر کراچی چیمبر آف کامرس اینڈ انڈسٹریز الطاف غفار نے کہا کہ سندھ کی تمام شاہراہوں پر ڈاکو راج ہے، قتل، اغوا برائے تاوان، بھتہ خوری اور لوٹ مار سمیت مجرمانہ سرگرمیاں بڑھنے پر تشویش ہے۔
انہوں نے کہا کہ غروب آفتاب کے بعد سندھ کی شاہراہوں سے گزرنا تقریباً ناممکن ہے، لاقانونیت کے باعث مال بردار گاڑیاں سامان لے جانے سے انکار کر دیتی ہیں۔
انہوں نے کہا کہ ڈاکو سپر ہائی وے، نیشنل ہائی وے اور انڈس ہائی وے پر مقررہ جگہوں پر لوٹ مار کرتے ہیں، سندھ کے کچے کے علاقے تک محدود مجرمانہ سرگرمیاں اب شاہراہوں تک بڑھ گئی ہیں۔
انہوں نے کہا کہ تاجروں کے لیے سامان کی ترسیل درد سر بن گیا ہے، سامان کی ترسیل میں خلل سے نقل و حمل کی لاگت بڑھ رہی ہے۔
قائم مقام صدر کراچی چیمبر آف کامرس اینڈ انڈسٹریز نے مطالبہ کیا کہ وزیر اعلیٰ اور آئی جی سندھ عوام کی جان و مال کا تحفظ یقینی بنائیں اور کچے کے ڈاکوؤں کے خلاف آپریشن کریں۔