خیبر پختونخوا کے ضلع شانگلہ کے علاقے بشام میں 26 مارچ کو چینی انجینئرز کی گاڑی پر خودکش حملہ ہوا تھا جس میں 5 چینی انجینئرز ہلاک ہوئے تھے۔
نجی نیوزچینل کو حساس ادارے کی جانب سے جاری کیا گیا مراسلہ موصول ہوگیا ہے جس کے مطابق حساس ادارے نے خودکش حملے کا الرٹ 15 مارچ کو جاری کیا تھا، حساس ادارے نے کالعدم ٹی ٹی پی کے 4 دہشت گردوں کے نام بھی بتائے تھے۔
الرٹ میں دہشت گردوں قاری موسیٰ، مولوی ضرار، مولوی سجاد اور عون ارمانی کے نام شامل تھے۔ الرٹ میں دہشت گردوں کی جانب سے 25 کلوپوٹاشیم کی خریداری کا بھی بتایا گیا۔
الرٹ میں خودکش حملے میں استعمال ہونے والی گاڑی کی خریداری کا بھی ذکر تھا، گاڑی سوات سے ڈھائی لاکھ روپے میں خریدی گئی۔ سینٹرل پولیس آفس کے پی نے آر پی او اور ڈی پی او مالاکنڈ کو 15 مارچ کو الرٹ سے آگاہ کیا تھا۔
حساس ادارے کے الرٹ کے باوجود مالاکنڈ پولیس نے مؤثر اقدامات نہ کیے،مالاکنڈ ڈویژن میں حملے کی پاداش میں آر پی او ہزارہ کو معطل کردیا گیا تھا۔