جمعیت علمائے اسلام (ف) کے سربراہ مولانا فضل الرحمان نے لکی مروت میں جلسے سے خطاب کرتے ہوئے کہا ہے کہ امریکا کو سی پیک بند کرنے کی یقین دہانی کروائی جا رہی ہے اور چین سے سی پیک بنانے کے عوض پیسے بٹورے جا رہے ہیں۔
عالمی طاقتیں پاکستان کی معاشی قوت ختم کرنا چاہتی ہیں، امریکا دہشتگردی ختم نہیں کرنا چاہتا بلکہ وہ دہشتگردی کا خالق ہے، لکی مروت اور فاٹا کی سرزمین پر آگ لگی ہے اور بدامنی کے شعلے جل رہے ہیں، انہوں نے افغانستان سے مذاکرات کرکے کامیابی حاصل کی تھی وہ کامیابی ناکامی میں کس نے بدل دی؟
انہوں نے کہا کہ طالبان کو آپ نے راستہ دیا جو دن اب دہاڑے سڑکوں پر لوگوں کو لوٹ رہے ہیں، انہیں یہ الیکشن قبول نہیں، وہ جعلی حکومت اور الیکشن کو نہیں مانتے، الیکشن کے نتائج کو تبدیل کیا گیا ہے۔
انہوں نے کہا اپوزیشن جماعتیں متفق ہیں کہ اپنے وسائل پر کسی کو قابض نہیں ہونے دیں گے، اصلی اور نقلی حکمران سُن لیں بلوچستان، خیبرپختونخوا اور دیگر صوبوں کے وسائل کے ساتھ کھڑے ہیں کسی کو اس پر قبضہ نہیں کرنے دیں گے۔