الیکشن کمیشن آف پاکستان نے 14 نومبر کو سندھ کے 26 اضلاع میں ضمنی بلدیاتی انتخابات کی براہ راست مانیٹرنگ کیلئے صوبائی، ڈویژنل اور ضلعی سطح پر کنٹرول رومز قائم کر دیے۔
ترجمان الیکشن کمیشن سندھ کے مطابق تمام کنٹرول رومز انتخابی عمل سے 24 گھنٹے پہلے فعال ہوںگے اور تمام پولنگ اسٹیشنز کے نتائج آنے تک اپنا کام جاری رکھیں گے۔
ترجمان کے مطابق الیکشن کمیشن آف پاکستان کی ہدایت پر صوبہ سندھ کے ضلع جیکب آباد، شکارپور، لاڑکانہ، قمبر شہداد کوٹ، گھوٹکی، سکھر، خیرپور، نوشہروفیروز، شہید بینظیر آباد، سانگھڑ، میرپورخاص، مٹیاری، ٹنڈوالہیار، حیدرآباد، ٹنڈو محمد خان، ٹھٹہ، ملیر، کورنگی کراچی، کراچی ویسٹ، کراچی ساؤتھ، کراچی سینٹرل اور کراچی کیماڑی سمیت 26 اضلاع کی خالی بلدیاتی نشتوں پر 14 نومبر کو ضمنی بلدیاتی انتخابات ہوں گے۔
الیکشن کمیشن کے ترجمان کے مطابق الیکشن کے عمل کو براہ راست مانیٹر کرنے کیلئے کنٹرول رومز قائم کیے گئے ہیں جو تین کیٹیگریز پر مشتمل ہوں گے۔
ترجمان کے مطابق صوبائی مانیٹرنگ کنٹرول روم صوبائی الیکشن کمشنر کے دفتر میں 24 گھنٹے انتخابی عمل کی نگرانی کرے گا جبکہ ریجنل مانٹیرنگ کنٹرول روم ڈویژنل سطح پر ریجنل الیکشن کمشنرز کی نگرانی میں انتخابی عمل کی نگرانی کرے گا۔
ضلعی سطح پر بھی کنٹرول رومز قائم کیے گئے ہیں جو کہ ڈسٹرکٹ ریٹرننگ آفیسر کی نگرانی میں مانیٹرنگ اور شکایات کا ازالہ کریں گے، تمام کنٹرول رومز انتخابی عمل سے 24 گھنٹے پہلے آپریشنل کر دیے جائیں گے اور تمام پولنگ اسٹیشنز کے نتائج آنے تک اپنا کام کام جاری رکھیں گے۔