اسلام آباد (شوریٰ نیوز ) سابق وزیراعظم ذوالفقار علی بھٹو کی حکومت کا تختہ الٹنے اور ضیاء الحق مارشل لاء کے خلاف پاکستان پیپلز پارٹی کے زیر اہتمام 46 واں یوم سیاہ کل 5 جولائی کو ملک بھر میں منایا جائے گا۔ پاکستان پیپلز پارٹی کے قائم مقام صدر سینٹرل پنجاب رانا محمد فاروق سعید کی طرف سے تمام ڈویڑنل ضلعی شہری اور تحصیل تنظیموں کے ساتھ ساتھ الائیڈ ونگز ٹکٹ ہولڈرز اور پارٹی ورکرز کو ہدایت کردی۔ ہدایت کے مطابق 5 جولائی 2023 کو یوم سیاہ کے طور پر منانے کا کہا گیا ہے۔ پارٹی کی سینیئر قیادت کی جانب سے جاری کردہ ہدایات کے مطابق تمام شرکاء کو بازووں پر بطور احتجاج سیاہ پٹیاں باندھنے اور آئین شکنی کے خلاف یوم سیاہ منانے کا کہا گیا ہے۔ہدایات میں یہ بھی کہا گیا ہے کہ پارٹی دفاتر میں بھی سیاہ پرچم لہرایا جائے گا اور پارٹی پرچم سرنگوں رکھا جائے گا۔