پاک بھارت کشیدگی کو مدنظر رکھتے ہوئے پاکستان سپر لیگ (پی ایس ایل) کے 10ویں ایڈیشن کے میچز کو ملتوی کیے جانے کا امکان ہے۔
ذرائع کے مطابق وزیر داخلہ محسن نقوی، پاکستان کرکٹ بورڈ (پی سی بی) اور پی ایس ایل میچز کے اسٹیک ہولڈرز کی میٹنگ کچھ دیر میں ہوگی، اجلاس میں ٹورنامنٹ کے میچز جاری رکھنے یا نہ رکھنے سے متعلق فیصلہ کیا جائے گا۔
پاکستان سپر لیگ (پی ایس ایل) کے 10ویں ایڈیشن کے پلے آف سے قبل 4 لیگ میچز باقی ہیں۔
ذرائع کا کہنا ہے کہ پی ایس ایل کمیٹی کا اہم اجلاس محسن نقوی کی مشاورت سے فیصلہ کرے گا جبکہ ایونٹ کا 27 واں میچ آج روالپنڈی کرکٹ اسٹیڈیم میں شیڈول ہے۔
پی ایس ایل میں آج کراچی کنگز اور پشاور زلمی کی ٹیمیں مدمقابل آئیں گی۔
دوسری جانب اہم معرکے سے قبل راولپنڈی کرکٹ اسٹیڈیم کے قریب سیکیورٹی فورسز نے بھارتی ڈرون طیارہ مار گرایا ہے۔
واضح رہے کہ بھارت میں انڈین پریمئیر لیگ (آئی پی ایل) جاری ہے جس کا مستقبل بھی خطرے میں دیکھائی دے رہا ہے، کیونکہ دونوں ممالک کے درمیان بڑھتی کشیدگی کے باعث پلئیر روانگی کی تیاری کررہے ہیں۔