قومی ٹیم کے سابق کرکٹر باسط علی بنگلادیش کیخلاف ٹی20 سیریز میں آل راؤنڈر شاداب خان کو اسکواڈ میں شامل کرنے پر بھرک اُٹھے۔
نجی ٹی وی چینل پر بنگلادیش کیخلاف 3 ٹی20 میچز پر مشتمل سیریز کیلئے اسکواڈ میں نائب کپتان اور آل راؤنڈر شاداب خان کی سلیکشن پر سوال اٹھاتے ہوئے کہا کہ پی ایس ایل کی کارکردگی بنیاد پر انہیں منتخب کرنا دیگر کھلاڑیوں کیساتھ زیادتی ہے۔
انہوں نے کہا کہ بطور سلیکٹر میں شاداب خان کو صرف پی ایس ایل کی کارکردگی کی بنیاد پر کبھی بھی قومی اسکواڈ میں شامل نہیں کرتا، ہمارے پاس ابرار، سفیان اور خوشدل شاہ جیسے کھلاڑی تھے جنہوں نے اس سیزن میں زبردست پرفارم کیا لیکن انہیں نظر انداز کردیا گیا۔
سابق کرکٹر کا کہنا تھا کہ سفیان مقیم، اسوقت فارم میں ہیں اور وہ آل راؤنڈر کی جگہ کے حقدار تھے۔
باسط علی نے سوال اٹھایا کہ پی ایس ایل پرفارمنس کی بنیاد پر محض وہی چہرے بار بار منتخب ہوتے رہے تو نوجوان پلئیرز کہاں جائیں گے۔
واضح رہے کہ بنگلادیش کے خلاف 3 ٹی 20 میچز کی سیریز کےلیے پاکستان کے 16 رکنی سکواڈ کا اعلان کردیا گیا، جس میں بابراعظم، محمد رضوان اور شاہین شاہ آفریدی کو آرام کروایا گیا ہے۔