پاکستانی کوہ پیما سعد منور نے دنیا کی 8 ہزار 848 میٹر بلند ماؤنٹ ایورسٹ کو شمال کی جانب سے سر کر کے تاریخ رقم کر دی۔
رواں ماہ میں تین پاکستانی کوہ پیماؤں نے نمایاں کارنامے انجام دیے ہیں، ساجد علی سدپارہ نے بغیر آکسیجن اور بغیر کسی پورٹر کی مدد کے دنیا کی ساتویں بلند ترین چوٹی دھولاگیری (8 ہزار 167 میٹر) سر کی جب کہ کوہ پیما سرباز خان اور نائلہ کیانی نے تیسری بلند ترین چوٹی ماؤنٹ کنچن جنگا (8 ہزار 586 میٹر) کو کامیابی سے سر کیا۔
سعد منور کے آفیشل فیس بک اکاؤنٹ پر ان کی اس کامیابی کی تصدیق کی گئی جس میں لکھا گیا کہ سعد نے دنیا کی بلند ترین چوٹی پر سبز ہلالی پرچم لہرا دیا۔
پوسٹ میں مزید لکھا گیا کہ یہ پہلا موقع ہے کہ کسی پاکستانی نے ماؤنٹ ایورسٹ کو شمالی رخ سے سر کیا ہے جب کہ سعد اس وقت کیمپ 3 پر محفوظ طریقے سے پہنچ چکے ہیں اور رات وہیں گزاریں گے۔
کوہ پیماؤں کے مطابق ایورسٹ کی شمالی سمت کی چوٹی تک پہنچنے کا راستہ تبت سے شروع ہوتا ہے جو نیپال کی جانب سے شروع ہونے والے ان پہاڑیوں کے عام راستے سے مختلف ہے۔
امیجن نیپال ایکسپیڈیشن ٹیم کے مالک مِنگما جی نے بتایا کہ سعد منور اور 8 دیگر غیر ملکی کوہ پیما کامیابی سے شمالی جانب سے ایورسٹ کی چوٹی پر پہنچے۔
ان کا کہنا تھا کہ سعد نے حال ہی میں بلند ترین چوٹیوں پر چڑھنا شروع کیا ہے اور وہ پہلے ہی آکونکاگوا، ایلبرس، کلیمنجارو اور لوبوچے پیک (نیپال) سر کر چکے ہیں۔
الپائن کلب آف پاکستان کے سیکریٹری کرار حیدری نے بھی ایک بیان میں سعد منور کو مبارکباد پیش کی ہے۔