میلبرن میں کھیلے جا رہے پہلے پاک آسٹریلیا ون ڈے میچ میں پاکستان کی بیٹنگ نے فلاپ شو پیش کیا اور پوری ٹیم 203 رنز پر ڈھیر ہوگئی۔
آسٹریلوی کپتان پیٹ کمنز کی جانب سے ٹاس جیت کر پاکستان کو پہلے بیٹنگ کی دعوت دی گئی لیکن گرین شرٹس مکمل 50 اوورز بھی نہ کھیل سکے۔ پوری ٹیم 46.4 اوورز میں 203 رنز پر ہی پویلین لوٹ گئی۔
پاکستان کی بیٹنگ کی ناکامی کا اندازہ اس بات سے لگایا جا سکتا ہے کہ ایک بلے باز بھی نصف سنچری نہ بنا سکا۔ کپتان محمد رضوان 44 رنز بنا کر ٹاپ اسکورر رہے۔ نسیم شاہ 40 اور بابر اعظم 37 رنز بنا کر دوسرے نمایاں بلے باز رہے۔
گرین شرٹس کو پہلی وکٹ کا نقصان صرف تین رنز پر اٹھانا پڑا جب صائم ایوب ایک رن پر مچل اسٹارک کے ہاتھوں بولڈ ہو کر اپنا ون ڈے انٹرنیشنل ڈیبیو یادگار نہ بنا سکے۔ 24 کے مجموعی اسکور پر عبداللہ شفیق بھی اسٹارک کی وکٹ بن گئے۔
بابر اعظم نے چند اچھے شاٹس کھیلے لیکن بڑی اننگ کھیلنے میں ناکام رہے۔ انہیں 37 کے انفرادی اسکور پر زمپا نے بولڈ کر دیا۔ کامران غلام کا 5 رنز پر کینگرو کپتان پیٹ کمنز نے شکار کیا۔
پاکستان کی وکٹیں وقفے وقفے سے گرتی رہیں اور کوئی بڑی پارٹنر شپ سامنے نہ آئی۔ شاہین شاہ آفریدی 24، عرفان خان 22، عبداللہ شفیق اور سلمان علی آغا صرف 12، 12 رنز ہی بنا سکے۔
آسٹریلیا کی جانب سے مچل اسٹارک سب سے کامیاب بولر رہے جنہوں نے 33 رنز دے کر 3 وکٹیں حاصل کیں۔ پیٹ کمنز اور ایڈم زمپا نے دو، دو جب کہ ایبٹ اور لبھوشن نے ایک، ایک کھلاڑی کو آؤٹ کیا۔
آج پاکستان کی جانب سے صائم ایوب اور عرفان خان نیازی نے ون ڈے انٹرنیشنل ڈیبیو کیا ہے۔ سابق قومی کپتان وسیم اکرم نے دونوں کھلاڑیوں کو ڈیبیو کیپ دی۔
میلبرن میں کرکٹ آسٹریلیا کی جانب سے پاکستانی شائقین کے لیے الگ فین زون بنایا گیا ہے جہاں پاکستانی سپورٹر باجے تاشوں کے ساتھ اسٹیڈیم میں آئے ہیں۔
اس سے قبل پاکستان اور آسٹریلوی کپتانوں محمد رضوان اور پیٹ کمنز نے ون ڈے سیریز ٹرافی کی رونمائی کی اور ٹرافی کے ہمراہ تصاویر بنوائیں۔
واضح رہے کہ پاکستان تین ون ڈے اور اتنے ہی ٹی 20 میچوں کی سیریز کھیلنے آسٹریلیا کی مہمان بنی ہے۔ دوسرا میچ 8 نومبر کو ایڈیلیڈ میں جب ک تیسرا اور آخری میچ 10 نومبر کو پرتھ میں کھیلا جائے گا۔ تمام میچز پاکستانی وقت کے مطابق صبح ساڑھے 8 بجے شروع ہوں گے۔
آسٹریلیا میں گرین شرٹس کا ریکارڈ خراب ہے اور پاکستان ٹیم کینگروز کو ان کی سر زمین پر صرف ایک ہی ون ڈے سیریز ہرا سکی ہے۔
ہیڈ ٹو ہیڈ مقابلوں میں بھی آسٹریلیا کا پلڑا بھاری ہے۔ دونوں ٹیموں نے 104 میچز کھیل رکھے ہیں جس میں کینگروز نے 70 کامیابیاں سمیٹی ہیں جب کہ پاکستان کے ہاتھ 34 فتوحات آئی ہیں۔