انسپکٹر جنرل پولیس پنجاب ڈاکٹر عثمان انور نے سوشل میڈیا پر پولیس اہلکار کی وائرل ویڈیو بارے اپنے پیغام میں کہا ہے کہ وائرل ویڈیو میں موٹر سائیکل سوار نظر آنے والا کانسٹیبل نفسیاتی بیماری کا شکار ہے جس کا علاج کروایا جارہا ہے۔ آئی جی پنجاب نے کہا کہ مذکورہ کانسٹیبل پہلے غیر حاضر ہوا، اس وقت اسکی دماغی حالت ٹھیک کرنے کیلئے علاج جاری ہے۔
ڈاکٹر عثمان انور نے مزید کہا کہ پولیس فورس کے 02 لاکھ ملازمین کی 10 بیماریوں کے خلاف سکریننگ و علاج مکمل ہونے جا رہا ہے تاہم سائیکالوجیکل پروفائلنگ کروانے سے بیشتر پولیس افسران اور اہلکار غیر ضروری خوف کا شکار ہیں۔
آئی جی پنجاب نے کہا کہ سائیکالوجیکل پروفائلنگ کا مقصد نفسیاتی عوارض کا شکار ملازمین کو علاج معالجہ اور کونسلنگ کی سہولت فراہم کرنا ہے، سائیکالوجیکل سکریننگ کا مقصد کسی ملازم کو نقصان پہنچانا یا نوکری سے نکالنا ہرگز نہیں ہے۔
آئی جی پنجاب ڈاکٹر عثمان انور نے کہا کہ سائیکالوجیکل تشخیص کے نتیجے میں سامنے آنے والے نفسیاتی عوارض کا شکار ملازمین کو انہیں متعلقہ معالجین کے پاس لے جایا جائے گا، کونسلنگ سیشن کے بعد ضرورت کے مطابق متاثرہ اہلکاروں کو علاج کی سہولت بھی فراہم کی جائے گی
آئی جی پنجاب ڈاکٹر عثمان انور نے کہا کہ سائیکالوجیکل پروفائلنگ ایک طویل پراسس ہے، مکمل ہونے میں زیادہ وقت درکار ہے، تمام کانسٹیبلز سے وعدہ ہے کہ سائیکالوجیکل پروفائلنگ کے بعد کسی کو نوکری سے برخاست نہیں کیا جائے گا۔
ڈی آئی جی اسٹیبلشمنٹ ڈاکٹر انعام وحید خان بھی ویڈیو میں آئی جی پنجاب کے ہمراہ موجود تھے، انہوں نے بھی فورس کی سائیکالوجیکل پروفائلنگ بارے اظہار خیال کیا۔