جب تک غزہ کےعوام کا قتل عام بند نہیں ہوتا تب تک ہماری کارروائیاں جاری رہیں گی: محمد البخیتی

یمن کی تحریک انصار اللہ کی سیاسی بیورو کے رکن محمد البخیتی نے کہا ہے کہ ہم اپنے وعدوں سے پیچھے ہٹنے والے نہیں اور جب تک صیہونی حکومت غزہ کے عوام کے قتل عام کا سلسلہ بند نہیں کرے گی ہم مذاکرات پر آمادہ نہیں ہوں گے۔

محمد البخیتی نے بحیرہ احمر میں انصار اللہ کی کارروائیوں کے جاری رہنے پر زور دیتے ہوئے کہا کہ یہ آپریشن امریکی حملوں سے متاثر نہیں ہوں گے۔ انہوں نے واشنگٹن کے اس دعوے کو مسترد کرتے ہوئے کہ انصار اللہ فورسز کو بھاری نقصان اٹھانا پڑا ہے، کہا کہ امریکہ کی طرف سے ہمارے جانی نقصان کے بارے میں فراہم کردہ اعداد و شمار غلط ہیں اور حملوں کی شدت کے باوجود ہمارے نقصانات بہت کم اور معمولی نوعیت کے تھے۔ پناہ گزینوں کے مرکز پر حالیہ حملے کا حوالہ دیتے ہوئے انہوں نے کہا کہ اس مرکز کے قریب ہماری کوئی عسسکری موجودگی نہیں ہے اور عام شہریوں کو نشانہ بنانے سے امریکہ کی مجرمانہ فطرت کی عکاسی ہوتی ہے۔