سابق وزیرِاعلیٰ پنجاب چوہدری پرویز الہٰی نے کہا ہے کہ بھارت اب دوبارہ حملے کی جرات نہیں کرے گا، بھارت نے دوبارہ جرات کی تو پھر مار کھائے گا۔
منی لانڈرنگ کیس کی سماعت کے بعد عدالت کے باہر میڈیا سے گفتگو کرتے ہوئے انہوں نے کہا کہ افواج پاکستان کو سلام پیش کرتا ہوں، پوری قوم پاک فوج کے ساتھ مل کر لڑی، ہم دشمن کے مقابلے میں ہم ایک ہیں۔
علاوہ ازیں پرویز الٰہی سمیت دیگر کے خلاف منی لانڈرنگ کیس کی سماعت کے دوران پراسیکیوٹر نے عدالت کو بتایا کہ ہم ہر ماہ انٹرپول کو مونس الٰہی کی گرفتاری کیلئے ریڈوارنٹ کی درخواست بھجواتے ہیں، جیسے ہی کوئی پیشرفت ہوتی ہے تو عدالت کو آگاہ کیا جائے گا۔
عدالت نے مونس الٰہی اور شریک ملزم جبران کے ریڈوارنٹ پر رپورٹ اور پرویز الٰہی کی بریت کی درخواست پر دلائل طلب کر لیے، سابق وزیر اعلیٰ پنجاب نے حاضری مکمل کروائی، فاضل جج نے پرویز الٰہی سے خیریت دریافت کی تو انہوں نے بتایا کہ جی اب بہتر محسوس کر رہا ہوں۔
پراسیکیوٹر کا کہنا تھا کہ ترمیمی چالان کو سامنے رکھ کر اس درخواست پر بحث کریں گے، ہمیں اس کیلیے مہلت دی جائے، وکیل سابق وزیر اعلیٰ پنجاب نے کہا کہ یہ آج تک کوئی ثبوت پیش نہیں کر سکے، ایف آئی اے صرف زبانی جمع خرچ کر رہا ہے۔
عدالت نے کیس کی سماعت کل تک ملتوی کر دی۔