مصر کے مفتی اعظم ڈاکٹر نظیر محمد عیاد نےکہا ہےکہ سعودی حکومت کے سرکاری اجازت نامےکے بغیر حج ادا کرنا نا صرف قانون کی خلاف ورزی ہے بلکہ شرعاً بھی ناجائز ہے۔
عرب میڈیا کے مطابق ایک انٹرویو میں مصری مفتی اعظم کا کہنا تھا کہ جب اجازت نامے کا حصول عوامی مفاد کے لیے ضروری قرار دیا گیا ہو تو اس کی خلاف ورزی گناہ کے زمرے میں آتی ہے، جو شخص اجازت نامےکے بغیر حج پر جاتا ہے وہ گناہ گار ہوتا ہے۔
ڈاکٹر نظیر کا کہنا تھا کہ اجازت نامہ حج کی استطاعت کی بنیادی شرط بن چکا ہے اور جب کسی کو اجازت نامہ نہ ملے تو اس پر حج فرض نہیں۔
ان کا کہنا تھا کہ بغیر اجازت حج کرنے والے افراد ناصرف قانون شکنی کرتے ہیں بلکہ اپنے ملک کی ساکھ بھی متاثر کرتے ہیں۔
مفتی اعظم مصر کا کہنا تھا کہ ایسی روش اسلامی تعلیمات کے خلاف ہے، اس طرح میزبان ملک سعودی عرب کو بھی نقصان پہنچےگا کیونکہ بغیر اجازت آنے والے افراد کی وجہ سے حج انتظامات پر بھی اثر پڑتا ہے۔