غزہ میں صیہونی فوج نے حماس کا ٹھکانہ کہہ کر اقوام متحدہ کے اسکول کو دھماکے سے اُڑا دیا، گزشتہ چوبیس گھنٹوں میں صیہونی حکومت کی جارحانہ اور وحشتناک کارروائیوں میں مزید 200 سے زائد فلسطینی شہید ہوگئے۔
اقوام متحدہ کی ریلیف اور ورکس ایجنسی برائے فلسطینی پناہ گزین کے کمشنر جنرل فلپ لازارینی نے اقوام متحدہ کے اسکول پر صیہونی حملے پر ردعمل دیتے ہوئے اپنے سوشل میڈیا اکاؤنٹ پر جاری بیان میں کہا کہ شمالی غزہ میں اقوام متحدہ کے ایک اسکول کو دھماکے سے اڑانے کی ویڈیوز دیکھی ہیں۔
انہوں نے کہا کہ تمام عوامی مقامات، اسکول اور اسپتالوں کو بین الاقوامی قوانین کے تحت امان حاصل ہے تاہم صیہونی حکومت کی جانب سے اسکولوں اور اسپتالوں پر حملے بہت ہی غضب ناک ہیں۔
ان کا کہنا تھا کہ اس خونخوار جنگ میں فریقین کو وہاں موجود اقوام متحدہ کے مراکز کی تمام تفصیلات دستیاب ہونے کے باوجود بھی اسکول پر حملہ کیا گیا۔
دوسری جانب صیہونی فوج نے کئی روز تک محاصرے کے بعد شمالی غزہ کے کمال عدوان اسپتال پر بھی دھاوا بول دیا ہے، صیہونی افواج کی جانب سے اسپتال سے طبی عملے سمیت متعدد افراد کو گرفتار کیا گیا۔
ادھر غزہ کے ساتھ ساتھ مغربی کنارے پر بھی اسرائیلی فوجی بربریت کا سلسلہ جاری ہے جہاں جنین شہر میں ڈرون حملہ اور فائرنگ کرکے مزید 5 فلسطینی شہید کردیے گئے۔
دوسری جانب غزہ میں حماس کی جانب سے بھی قابض فوج پر جوابی حملے جاری ہیں، حماس کے جنگجوؤں نے شجاعیہ میں 11 اور خان یونس میں 5 صیہونی فوجی ہلاک کرنے کے دعویٰ کیساتھ مارٹر گولوں اور میزائلوں سے صیہونی فوج کا کیمپ، متعدد ٹینکوں اور بکتر بند گاڑیوں کو بھی تباہ کردیا۔
فلسطینیوں کے خلاف جارحیت کے دوران بدحواس صیہونی فوج نے حملوں میں اپنے ہی فوجیوں کو مار ڈالا، 13 فوجی فرینڈلی فائرنگ اور 20 فوجی آپریشنل حادثات میں مارے گئے جبکہ غزہ سے دو صیہونی مغویوں کی لاشیں بھی برآمد ہوئیں۔