فلسطین کی مزاحمتی تحریک حماس کے عسکری ونگ القسام بریگیڈز نے میدان جنگ کی کارروائی کی نئی ویڈیو جاری کر دی۔
صیہونی افواج کی جانب سے غزہ میں مسلسل عالمی قوانین اور انسانی حقوق کی خلاف ورزیوں کا سلسلہ جاری ہے، صیہونی افواج عام شہریوں اور طبی مراکز کو نشانہ بنارہی ہے۔
تاہم صیہونی فوج کو فلسطینی مزاحمتی تنظیموں کی جانب سے سخت مزاحمت کا بھی سامنا ہے۔
نئی جاری ہونے والی ویڈیو میں القسام بریگیڈز کی جانب سے کئی صیہونی ٹینکوں اور گاڑیوں کو انتہائی قریب سے نشانہ بناتے دکھایا گیا۔
ویڈیو میں صیہونی فوج کو حماس کے راکٹوں سے تباہ ٹینکوں کو کھینچ کر لے جاتے ہوئے بھی دیکھا گیا۔
حماس میڈیاکے مطابق غزہ میں ٹینک کے پیچھے چھپے کئی صیہونی فوجی راکٹوں کا نشانہ بنے جبکہ عمارتوں میں بھی چھپے صیہونی فوجیوں کو حماس کے اسنائپر کی جانب سے نشانہ بنایا گیا۔
گزشتہ روز صیہونی حکومت نے دعویٰ کیا تھاکہ غزہ میں القسام بریگیڈز کے زیر استعمال سب سے بڑی سرنگ تلاش کرلی ہے اور یہ سرنگ 4 کلومیٹر طویل اور 165 فٹ گہرائی میں جاتی ہے جس میں بجلی کا نظام بھی موجود ہے۔
تاہم حماس نے صیہونی حکومت کی جانب غزہ میں سب سے بڑی سرنگ تلاش کرنے کے فخریہ اعلان پر معنی خیز ردعمل دیا ہے۔
حماس کے عسکری ونگ القسام بریگیڈز نے سرنگ کی ویڈیو جاری کی جس میں سے نکل کر مجاہدین نے صیہونی فوجی چھاؤنی پر حملہ کیا تھا اور کئی صیہونی فوجیوں کو ہلاک کیا تھا۔
ویڈیو کے ساتھ القسام بریگیڈز نے لکھاکہ ’بہت دیر کردی، ہمارا مشن تو مکمل ہوگیا‘۔
صیہونی فوج نے اتوار کو زمینی آپریشن میں مزید 5 فوجی اہلکاروں کی ہلاکت کا اعتراف کیا ہے جس کے بعد غزہ آپریشن میں مرنے والے فوجیوں کی تعداد 127 ہوگئی ہے۔