غزہ میں صیہونی فوج کی رہائشی علاقوں پر شدید بمباری سے مزید 250 فلسطینی شہید ہوگئے۔
غیر ملکی میڈیا رپورٹس کے مطابق غزہ میں گزشتہ 24 گھنٹوں میں صیہونی بمباری سے سڑکیں تباہ ہوگئیں جبکہ ایمبولینسوں کو زخمیوں تک پہنچنے میں شدید دشواری کا سامنا ہے۔
فلسطینی وزارت صحت کے مطابق صیہونی فوج نے پیر کے روز مغازی مہاجرین کیمپ پر بمباری کی جس کے نتیجے میں 70 فلسطینی شہید ہوگئے جبکہ گزشتہ 24 گھنٹے میں صیہونی بمباری سے کل 250 فلسطینی شہید ہوئے۔
فلسطینی وزارت صحت کے مطابق 7 اکتوبر سے صیہونی بمباری سے شہید فلسطینیوں کی تعداد 20 ہزار 674 ہوگئی جبکہ 54 ہزار 536 فلسطینی زخمی ہیں۔
دوسری جانب فلسطینی مزاحمت کاروں نے میجر سمیت کئی صیہونی فوجی بھی مار دیے ہیں اور درجنوں صیہونی فوجی گاڑیاں تباہ کردیں،7 اکتوبرسے اب تک غزہ جنگ میں 489 صیہونی فوجی ہلاک ہوچکے ہیں۔
رپورٹس کے مطابق مغربی کنارے میں صیہونی فوج کے چھاپے میں 35 فلسطینیوں کو گرفتار کرلیا گیا۔
ادھر صیہونی وزیراعظم نے ایک بار پھر غزہ جنگ طویل عرصے جاری رکھنے کی دھمکی دی ہے جبکہ حماس نے عالمی فوجداری عدالت سے صیہونی جنگی جرائم کے احتساب کا مطالبہ کیا ہے۔
رپورٹس کے مطابق مقبوضہ فلسطین کی مزاحمتی تنظیموں حماس اور اسلامی جہاد نے جنگ بندی کیلئے غزہ سے دستبردار ہونے کی مصر تجویز مسترد کردی۔