لبنانی مزاحمتی تنظیم حزب اللہ نے صیہونی قصبے المطلہ کے نزدیک صیہونی فوجیوں پر میزائل حملہ کردیا، حملے میں ایک صیہونی ٹینک بھی تباہ کردیا گیا جبکہ متعدد صیہونی فوجیوں کے ہلاک اور زخمی ہونے کی بھی اطلاعات ہیں۔
حزب اللہ کی جانب سے جبل ہرمون کے صیہونی فضائی اڈے پر بھی 62 راکٹ داغے گئے تھے جس کے بعد صیہونی علاقوں میں سائرن بج اٹھے تھے۔
حزب اللہ کے تازہ حملوں کے بعد صیہونی میڈیا نے تصدیق کردی ہے کہ میزائل حملے میں ایک گھر کو نقصان پہنچا ہے تاہم صیہونی فوج نے حزب اللہ کے بیش تر راکٹ مار گرانے کا دعویٰ کیا ہے۔
دوسری جانب جنگی جنون میں مبتلا صیہونی وزیر اعظم نیتن یاہو نے حزب اللہ کو دھمکی دی ہے کہ حزب اللہ بھی وہ سبق سیکھ لے جو حماس نے سیکھا ہے۔
صیہونی وزیر اعظم کا کہنا تھا کہ سفارتی ذرائع سے مسئلہ حل کرنے کی کوشش کریں گے ورنہ دوسرا طریقہ نکالیں گے۔
صیہونی وزیراعظم کی دھمکی کے ردعمل میں حزب اللہ نے بھی ترکی بہ ترکی جواب دیتے ہوئے کہا کہ صیہونی حکومت کے حملوں کا اسی کی زبان میں جواب دیا جائے گا۔
لبنانی مزاحمتی تنظیم حزب اللہ کا کہنا تھا کہ غزہ جنگ کے مکمل خاتمے تک صیہونی حکومت سے بات نہیں ہوگی۔