فلسطین کی اسلامی مزاحمتی تحریک (حماس) کی عسکری شاخ کتائب عزالدین القسام کے مجاہدوں نے خان یونس کے مشرقی علاقے میں صیہونی فوج کے ایک ہیلی کاپٹر کو زمین سے فضا میں مار کرنے والے میزائل سے تباہ کر دیا۔
فارس خبر رساں ایجنسی کی رپورٹ کے مطابق، استقامتی محاذ کتائب عزالدین القسام نے آج جنگ کے 99 ویں دن، غزہ کی پٹی پر ایک صیہونی فوجی ہیلی کاپٹر کو تباہ کرنے کا اعلان کرتے ہوئے کہا کہ مزاحمت کے حملے میں چار مرکاوا ٹینک اور ایک بلڈوزرکو خان یونس کے مشرق میں ایلیاسین 105 نامی میزائل سے تباہ کر دیا گیا۔
دریں اثناء فلسطینی مجاہدین کے ایک اور گروپ نے خان یونس کے مشرق میں متعدد صیہونی فوجیوں کومارٹر گولوں سے نشانہ بنایا جس کے نتیجے میں متعدد صیہونی فوجی ہلاک ہو گئے۔
فلسطینی مزاحمتی گروپوں کے اعلان کے مطابق خان یونس کے مشرق میں فلسطینی مجاہدین کی براہ راست فائرنگ سے دو صیہونی فوجی بھی مارے گئے جبکہ مشرقی علاقے "عین نفق” میں مارٹر گولوں سے چار غاصب صیہونی فوجی ہلاک اور زخمی ہوئے۔
غزہ کی پٹی میں تقریباً 100 دن کی جنگ کے بعد صیہونی فوج کے ترجمان نے اعتراف کیا ہے کہ 500 سے زائد صیہونی ہلاک ہو چکے ہیں، تاہم انہوں نے کبھی بھی ہلاک اور زخمی ہونے والے صیہونی فوجیوں کی صحیح تعداد کا اعلان نہیں کیا۔
فلسطین کی وزارت صحت کے اعلان کے مطابق 7 اکتوبر سے غزہ کی پٹی کے مختلف علاقوں میں صیہونی حکومت کی جارحیت کے نتیجے میں شہید ہونے والوں کی تعداد 23 ہزار843 اور زخمیوں کی تعداد 60 ہزار 317 ہو گئی ہے۔