صیہونی فوج نے غزہ کے پناہ گزینوں کے کیمپ رفح میں گھر پر بمباری کرکے بچوں سمیت ایک ہی خاندان کے 12 افراد کو شہید کردیا۔
7 اکتوبر کے بعد سے صیہونی حکومت نے اپنی جارحیت کو غزہ پر جاری رکھا ہوا ہے جس کے نتیجے میں اب تک شہید بچوں کی تعداد 10 ہزار سے زائد جب کہ صیہونی حملوں میں شہید فلسطینیوں کی تعداد 24 ہزار 285 ہوگئی ہے، 61 ہزار سے زائد فلسطینی زخمی ہوچکے ہیں۔
اس کے علاوہ غزہ کا طویل ترین مواصلاتی بلیک آؤٹ بھی پانچویں روز میں داخل ہوگیا ہے۔
ادھر حماس کے جنگجوؤں نے صیہونی فوجیوں پر جوابی حملے جاری رکھے ہوئے ہیں، حماس کی جانب سے خان یونس میں صیہونی فوج اور گاڑیوں پر حملے کیے گئے جس میں متعدد صیہونی فوجی ہلاک اور زخمی ہوئے جب کہ صیہونی علاقے میں بھی راکٹ حملے کرکے عمارتوں کو نقصان پہنچایا۔
دوسری جانب اقوام متحدہ نے خبر دار کیا ہے کہ غزہ میں 22 لاکھ افراد قحط کے انتہائی خطرے سے دوچار ہیں جس کے سبب اقوام متحدہ نے امداد کی فوری ترسیل بڑھانے پر زور دیا ہے۔
وائٹ ہاؤس نے کہا ہے کہ صیہونی یرغمالیوں کی رہائی کے لیےقطر میں بات چیت کررہے ہیں۔