نگران وفاقی وزیر تجارت ، صنعت وسرمایہ کاری ڈاکٹر گوہر اعجاز نے کہا ہے کہ حکومت 20 ہزار چھوٹے کاروباروں پر توجہ مرکوز کر رہی ہے۔تاکہ برآمدات کو بڑھاکر زرمبادلہ میں اضافہ کیا جا سکے۔
انہوںنے یو ایس ایڈ کے سرمایہ کاری سمٹ میں خطاب کرتے ہوئے کہا ہے کہ بیس ہزار چھوٹے کاروباروں میں سے ہر کوئی ایک ملین ڈالر کی برآمدات کرے تو تجارتی خسارہ ختم ہو سکتا اور یہ ہدف ایک سال میں حاصل ہوسکتا ہے۔
چھوٹے اور درمیانے درجے کے کاروباروں پر توجہ مرکوز کی جا رہی ہے اور اس حوالے سے متعدد اقدامات اٹھائے گئے ہیں، ہمارا تجارتی خسارہ 20 ارب ڈالر ہے۔
وزارت تجارت نے چھوٹے اور درمیانے درجے کے کاروباری افراد کو مصر ، چین اور جی سی سی ممالک کے دورے کر ائے ہیں تاکہ نئی منڈیاں تلاش کی جاسکیں۔ اس سلسلے میں خاطر خواہ کامیابی حاصل ہوئی ہے۔