غزہ میں صیہونی حملوں کے نتیجے میں شہید فلسطینیوں کی تعداد 26 ہزار سے تجاوز کرگئی۔
غیر ملکی میڈیا کے مطابق غزہ کی وزارت صحت کا بتانا ہےکہ گزشتہ 24 گھنٹوں کے دوران صیہونی فوج کے حملوں میں مزید 183 افراد شہید اور 377 کے قریب زخمی ہوئے ہیں۔
میڈیا رپورٹس کے مطابق صیہونی فوج نے خان یونس شہر میں مہاجرین کے کیمپ اور عوامی سہولیات کے مراکز پر شیلنگ کی جب کہ الامل اسپتال پر فائرنگ سے وہاں موجود لوگوں نے اسپتال چھوڑ دیا۔
میڈیا رپورٹس میں بتایا گیا ہےکہ صیہونی فوج نے الامل اسپتال سے باہر نکلنے والوں پر فائرنگ کی جس کے نتیجے میں دو بھائی شہید ہوگئے، ان میں سے ایک نوجوان نے ہاتھ میں امن کی علامت سفید جھنڈا بھی تھام رکھا تھا۔
صیہونی فوج نے سوشل میڈیا پر جاری بیان میں غزہ پر زمینی اور فضائی حملوں کی تصدیق کی ہے اور بتایا کہ صیہونی فوج پورے غزہ میں زمین اور فضا سے حملے جاری رکھے ہوئے ہے۔
صیہونی فوج نے دعویٰ کیا کہ اس کی فضائیہ نے حملوں میں آپریشنز سینٹرز اور اسلحہ کے گودام تباہ کیے ہیں جب کہ ان حملوں میں اینٹی ٹینک پوسٹیں بھی تباہ کی گئیں جو فلسطینی مزاحمت کار استعمال کررہے تھے۔
صیہونی فوج کی غزہ پر 7 اکتوبر سے جاری بربریت میں شہید ہونے والے فلسطینیوں کی تعداد 26 ہزار سے تجاوز کرچکی ہے جب کہ 64 ہزار سے زائد فلسطینی زخمی ہیں۔