صیہونی فوج کی جانب سے غزہ میں فلسطینیوں کا بدترین قتل عام جاری ہے، صیہونی حکومت کے حملوں میں مزید 112 فلسطینی شہید ہوگئے۔
غیر ملکی میڈیا رپورٹ کے مطابق صیہونی فوج نے ایک مرتبہ پھر غزہ کے ال امل اسپتال پر دھاوا بول دیا۔
اقوام متحدہ کا کہنا ہے کہ صیہونی جارحیت کی وجہ سے النصر، ال امل اسپتال میں مریضوں کیلئے آکسیجن کی شدید قلت ہوگئی ہے۔
رپورٹ میں بتایا گیا ہے کہ خان یونس میں ایک ہفتے قبل تباہ ہونے والے گھر سے 12 لاشیں بر آمد ہوئی ہیں۔گزشتہ روز پناہ گزین کیمپ سے بھی 14 فلسطینیوں کی لاشیں برآمد ہوئی تھیں۔
فلسطینی وزارت صحت کا کہنا ہے کہ 24گھنٹوں میں صیہونی حملوں میں 112فلسطینی شہید جبکہ 148 زخمی ہوئے۔
اکتوپر سے جاری صیہونی حملوں سے شہید فلسطینیوں کی تعداد 27 ہزار 131 ہوگئی ہے جبکہ 66 ہزار 287 زخمی بھی ہیں۔
اقوام متحدہ کے مطابق صیہونی حملوں کے باعث غزہ ناقابل رہائش ہو چکا ہے اور غزہ کی 80 فیصد سے زائد آبادی نقل مکانی کر چکی ہے۔
دوسری جانب صیہونی فوج کی جانب سے مغربی کنارے میں بھی چھاپا مار کارروائیاں جاری ہیں، جنین ،نابلس،اور ہیبرون میں کارروائیاں کی گئی۔
غیر ملکی میڈیا کے مطابق صدر بائیڈن نے مغربی کنارے میں تشدد میں ملوث 4 اسرائیلیوں پر پابندیاں لگا دیں۔
ادھر انسٹی ٹیوٹ فار دی اسٹڈی آف وار اینڈ کریٹیکل تھریٹس پروجیکٹ کی رپورٹ میں انکشاف ہوا ہے کہ 27 ہزار سے زائد فلسطینیوں کے قتل عام میں ملوث صیہونی فوج رفح آپریشن کا منصوبہ بنا رہی ہے۔
رپورٹ میں کہا گیا ہے کہ صیہونی حکومت نے یہ فیصلہ نہیں کیا کہ وہ آپریشن کے دوران شہری آبادی کا انخلا کس طرح کرے گا، صیہونی آپریشن سے جزیرہ نما سینائی میں فلسطینی پناہ گزینوں کی ہجرت بڑھ سکتی ہے۔