تل ابیب: صیہونی حکومت وزیراعظم نیتن یاہو نے صیہونی فوج پر کسی بھی ممکنہ پابندی کو مسترد کردیا۔
غیر ملکی میڈیا رپورٹس میں بتایا گیا ہےکہ امریکا کی جانب سے صیہونی فوج کی ایک بٹالین کی امداد کم کرنے پر غور کیا جارہا ہے۔
رپورٹس کے مطابق صیہونی فوج کی ایک بٹالین پر مقبوضہ مغربی کنارے پر انسانی حقوق کی خلاف ورزیوں کا الزام ہے جس بناء پر امریکا اس یونٹ کو اپنا ہدف بنائے گا اور اس کی امداد میں کمی کرے گا۔
اس سلسلے میں صیہونی وزیراعظم نیتن یاہو نے فوج پر کسی بھی پابندی کے ممکنہ منصوبے کو مسترد کرتے ہوئے کہا ہےکہ وہ اس حوالے سے اپنی پوری طاقت سے جدوجہد کریں گے۔
رپورٹس کے مطابق گزشتہ ہفتے اس حوالے سے امریکی وزیر خارجہ انٹونی بلنکن سے سوال کیا گیا تھا جس پر انہوں نے کہا کہ میں نے کچھ دستاویزات تیار کی ہیں، آپ آنے والے دنوں میں اس حوالے سے کچھ توقعات رکھ سکتے ہیں۔
رپورٹس کے مطابق صیہونی حکومت کے سب سے اہم اتحادی امریکا نے اس سے قبل صیہونی حکومت کی دفاعی امداد میں کبھی کمی نہیں کی ہے۔
صیہونی فوج کا کہنا ہےکہ جس بٹالین پر انسانی حقوق کی خلاف ورزیوں کے الزامات ہیں وہ بٹالین بین الاقوامی قوانین کے مطابق کام کررہی ہے۔
صیہونی وزیر دفاع نے بھی امریکا سے مطالبہ کیا ہےکہ وہ فوجی یونٹ پر پابندی کے منصوبے سے دستبردار ہو، دنیا صیہونی حکومت اور امریکا کے قریبی تعلقات پر گہری نگاہ رکھے ہوئے ہے۔