وزیر اعظم شہباز شریف نے کہا ہے کہ پاکستان کی مشکل وقت میں مدد کرنے پر سعوی عرب کا مشکور ہوں، اس کی فراخ دلی کو سراہنے کے لیے میرے پاس الفاظ نہیں ہیں۔
اسلام آباد میں سعودی سرمایہ کاروں اور کاروباری افراد کے اعزاز میں عشائیے کی تقریب منعقد ہوئی جس سے وزیراعظم شہباز شریف نے خطاب بھی کیا۔
وزیراعظم شہباز شریف نے اپنے خطاب میں کہا کہ سعودی عرب کی پاکستان کیلئے فیاضی بے مثال ہے، سعودی کمپنیوں کے وفد کا دورہ پاکستان دونوں ملکوں کے لیے مفید ہوگا۔
سعودی عرب کی معیشت بہت تیزی سے ترقی کرنے والے ملکوں میں شامل ہے، زراعت ،آئی ٹی ،ٹیکنالوجی سمیت کئی شعبوں میں سعودی عرب ترقی کر رہا ہے۔
سعودی عرب نے ہر مشکل میں پاکستان کا ساتھ دیا ہے، سعودی عرب 7 دہائیوں سے پاکستان کا ساتھ دے رہا ہے، اس کی پاکستان کیلئے فیاضی بے مثال ہے۔
سعودی عرب کا پاکستان کی مشکل وقت میں مدد کرنے پر مشکور ہوں، سعودیہ کی کی فراخ دلی کو سراہنے کے لیے میرے پاس الفاظ نہیں ہیں، محمد بن سلمان پاکستان کی ہر سطح پر مدد کے لیے تیار ہیں۔
سعودی کمپنیاں پاکستان کی سرمایہ کار دوست پالیسیوں سے فائدہ اٹھائیں، اگر آپ وقت کے ساتھ تبدیل نہیں ہوتے تو وقت کبھی بھی آپ کا انتظار نہیں کرتا۔
سعودی انویسٹرز کا دورہ کامیاب بنانے کیلئے جنرل عاصم منیر کا خصوصاً شکر گزار ہوں، آرمی چیف نے سعودی دورہ کامیاب بنانے کیلئے قابل ذکر سپورٹ، انتھک محنت کی۔
دوسری جانب سعودی نائب وزیر سرمایہ کاری ابراہیم المبارک نے کہا کہ وزیراعظم سے دو ہفتے پہلےکی ملاقات کے بعد ہمارا پاکستان آنا ثبوت ہے کہ پاکستان سے ہماری دوستی اور شراکت داری بہت اہم ہے۔