در مملکت آصف علی زرداری نے ایوان صدر میں منعقدہ اجلاس میں کہا ہےکہ آزاد جموں و کشمیر کے عوام کے مطالبات کو قانون کے مطابق پورا کیا جانا چاہیے ۔
موجودہ صورتحال کا حل نکالنےکے لیے عوام کی شکایات پر وزیر اعظم پاکستان سے بات کروں گا،اجلاس میں پیپلزپارٹی آزاد کشمیر کی پارلیمانی پارٹی کے تمام ارکان شریک ہوئے۔
اجلاس میں شرکاء نے حکومت اور وزیراعظم آزادکشمیر کے خلاف شکایات کے انبار لگا دیے، پیپلزپارٹی کی اعلیٰ قیادت نے آزادکشمیر کی حکومت کے حوالے سے مختلف آپشنز پر غور کیا۔
ایوان صدر سے جاری اعلامیے کے مطابق صدر مملکت نے آزادکشمیر کی موجودہ صورتحال پر افسوس کا اظہار کیا اور پولیس اہلکار کی افسوسناک ہلاکت پر تعزیت کا اظہار کیا اور جھڑپوں میں زخمی تمام افراد کی جلد صحت یابی کی دعا کی۔
اعلامیے کے مطابق صدر مملکت کا کہنا تھا کہ تمام اسٹیک ہولڈرز تحمل کا مظاہرہ کریں اور آزاد کشمیر کے مسائل بات چیت اور مشاورت سے حل کریں، سیاسی جماعتوں، ریاستی اداروں اور آزاد کشمیر کے عوام کو ذمہ داری سے کام لینا چاہیے۔
آزادکشمیر کے عوام کے مطالبات کو قانون کے مطابق پورا کیا جانا چاہیے، موجودہ صورتحال کا حل نکالنے کے لیے آزاد کشمیر کے عوام کی شکایات پر وزیراعظم پاکستان سےبات کروں گا۔
صحت، تعلیم، سیاحت اور انفرااسٹرکچر سمیت آزاد کشمیر کی سماجی واقتصادی ترقی کو ترجیح دی جانی چاہیے،صدرمملکت نے دور دراز علاقوں کو ملک کے دیگر ترقی یافتہ علاقوں کے برابر لانےکی ضرورت پر بھی زور دیا۔