جمیعت علمائے اسلام (جے یو آئی) کے سربراہ مولانا فضل الرحمن نے فیصل آباد میں جامعہ عبیدیہ کے محتمم کی وفات پر تعزیت کے موقع پر میڈیا سے بات چیت کرتے ہوئے کہا ہے کہ ہر الیکشن ہی متنازعہ ہوا اب اسے ہر صورت درست کرنا ہوگا۔
اسٹیبلشمنٹ بند گلی میں جا چکی ہے، آئین کیلئے سب سیاستدانوں کو مل کر بیٹھنا ہو گا، پی ٹی آئی کی جانب سے جے یو آئی کے ساتھ سیز فائر ہو چکا ہے، عمران خان سے جیل میں ملاقات نہیں کر رہا۔ آج کل ایسے سوالات پتا نہیں کیوں کیے جا رہے ہیں؟
پیپلز پارٹی تو آئینی عہدے بھی لے رہی ہے اور کہتی ہے ہم حکومت میں نہیں ہیں، پیپلز پارٹی حکومت میں نہیں ہے اس کا مطلب حکومت اقلیتی چل رہی ہے۔
تمام سیاستدانوں کو فکر کرنا ہوگی کہ ہمارے الیکشن متنازعہ ہوتے ہیں، ملک کا نظام اس وقت خراب ہے، آئین موجود ہے لیکن عمل درآمد نہیں ہے، اٹھارویں ترمیم کیلئے بھی بیٹھے تھے۔
مولانا فضل الرحمان کا کہنا تھا کہ الیکشن کمیشن تو ہاتھ پر ہاتھ رکھ کر بیٹھا دیکھتا رہتا ہے، جب آئین پر عمل ہی نہیں ہوگا تو پھر آئین کیوں بنایا؟