ہیلی کاپٹر حادثے میں شہید ایرانی صدر ابراہیم رئیسی، وزیرخارجہ حسین امیر اور دیگر افراد کی نمازجنازہ ادا کردی گئی، حماس کے رہنما اسماعیل ہنیہ نے بھی نماز جنازہ میں شریک کی۔
ایران کے سپریم لیڈر آیت اللّٰہ خامنہ ای نے نماز جنازہ پڑھائی۔ 40 ممالک کے سربراہان کی نماز جنازہ میں شرکت متوقع تھی۔ وزیر اعظم شہباز شریف بھی تہران جائیں گے۔ اس حوالے سے ترجمان دفترخارجہ کا کہنا ہے کہ وزیراعظم کے ہمراہ کابینہ کےسینئروزرا بھی ہوںگے۔
تہران میں لوگوں کی بڑی تعداد جمع ہے، لاکھوں سوگوار شہری صدر ابراہیم رئیسی کے آخری دیدار کے لیے جوق در جوق پہنچے۔
صدر اور ان کے ساتھیوں کی میتیں طیارے کے ذریعے تبریز سے تہران لائی گئیں، ایرانی صدر کو آبائی شہر مشہد میں امام علی رضا کے روضہ کے احاطہ میں سپرد خاک کیا جائے گا۔
یاد رہے کہ ایرانی صدر ابراہیم رئیسی کا ہیلی کاپٹر 19 مئی بروز اتوار حادثے کا شکار ہوا تھا، جس کا ملبہ چودہ گھنٹے بعد پیر کو ملا تھا۔
صدر ابراہیم رئیسی آذربائیجان کی سرحد پر ڈیم کی افتتاحی تقریب سے واپس آرہے تھے کہ ہیلی کاپٹر گر کر تباہ ہوا، جس کے نتیجے میں ایرانی صدر، وزیر خارجہ حسین امیر عبد اللہیان سمیت نو افراد شہید ہوگئے تھے۔
واضح رہے کہ ابراہیم رئیسی کے ہیلی کاپٹر حادثے میں شہید ہونے کے بعد نائب صدر محمد مخبر نے ایران کے صدر کی ذمے داریاں سنبھال لی ہیں، ایران میں باقاعدہ صدارتی انتخاب 28 جون کو ہوگا۔