عالمی عدالت انصاف نے صیہونی حکومت کو رفح میں فوجی آپریشن روکنے کا حکم دے دیا۔
عالمی عدالت انصاف میں رفح میں صیہونی آپریشن رکوانے کے لیے جنوبی افریقا کی درخواست پر فیصلہ سنایا گیا۔
عالمی عدالت نے فیصلہ 2-13 کی اکثریت سے سنایا، درخواست پر فیصلہ عالمی عدالت انصاف کے جسٹس نواف سلام نے پڑھ کر سنایا۔
فیصلے میں کہا گیا کہ صیہونی فوج کوغزہ کےعلاقےرفح میں فوجی کارروائیاں فوری طورپرروکنی ہوں گی،غزہ پٹی کےشہری انتہائی تشویشناک حالات سےدوچارہیں۔
عدالت نے فیصلے میں یہ بھی کہا کہ صیہونی حکومت فوری طور پر رفح کی بارڈر کراسنگ کو کھولے۔
عدالت نے کہا کہ رفح میں فوجی آپریشن سے انتہائی افسوسناک انسانی سانحہ جنم لےسکتا ہے۔
عالمی عدالت انصاف کے فیصلے میں کہا گیا کہ صیہونی حکومت ایک ماہ کے دوران غزہ کی پٹی میں صورتحال بہتربنانےکے اقدامات کی رپورٹ عدالت میں پیش کرے۔
فیصلے میں یہ بھی کہا گیا کہ صیہونی حکومت بین الاقوامی تفتیشی ٹیم کے ارکان کو غزہ پٹی میں داخل ہونے کی اجازت دے۔
عدالت کا اپنے حکم میں کہنا ہے رفح میں صیہونی اقدامات سےفلسطینی عوام کو شدید خطرات لاحق ہیں۔
عدالت نے کہا کہ صیہونی حکومت نےکئی ہفتوں کی شدید بمباری کے بعد رفح میں زمینی آپریشن شروع کیا، صیہونی حکومت غزہ سےانخلا کے لیے حفاظتی اقدامات کرنےمیں ناکام رہا۔
عدالت نے کہا کہ رفح میں لاکھوں فلسطینیوں نے پناہ لے رکھی تھی، رفح میں صیہونی زمینی آپریشن سے 8 لاکھ فلسطینی بےگھر ہوئے۔
عدالت نے کہا کہ عدالت کے پچھلے احکامات کے بعد اب صورتحال بدل چکی ہے، اقوام متحدہ نے بارہا صیہونی آپریشن کے خطرات سے آگاہ کیا، اقوام متحدہ کے بتائے گئے خطرات عملی شکل اختیار کرنےلگے ہیں۔