رفح میں صیہونی فوج نے اقوام متحدہ کی جانب سے محفوظ قرار دیے گئے کیمپ پر بمباری کی جس کے نتیجے میں 75 سے زائد فلسطینی زندہ جل کر شہید اور درجنوں جھلس کر زخمی ہو گئے۔
صیہونی بمباری سے رفح کے پناہ گزین کیمپ میں آگ لگ گئی جس میں بڑی تعداد میں شہادتیں آگ میں جھلسنے کی وجہ سے ہوئیں، شہدا میں خواتین اور بچوں کی بڑی تعداد شامل ہے، پناہ گزین کیمپ میں شمالی غزہ سے بے دخل فلسطینیوں کی بڑی تعداد میں مقیم ہے۔
رپورٹس کے مطابق آگ میں جھلسنےکے باعث کئی افراد کی حالت نازک ہے، شہداء کی تعداد بڑھنے کا خدشہ ہے۔
رپورٹس کے مطابق صیہونی حکومت نے غزہ میں یو این کیمپوں پر دسواں حملہ کیا ہے، 24 گھنٹوں میں 230 سے زائد فلسطینیوں کا قتل عام کیا گیا، اس سے قبل صیہونی حکومت نے جبالیہ، نصیرت اور غزہ سٹی میں کیمپوں پر حملوں میں 160 فلسطینیوں کا قتل کیا۔
فلسطینی حکام کا کہنا ہے کہ رفح میں کیمپ پر 900 کلو سے زائد وزنی بموں کا استعمال کیا گیا، فلسطینی اتھارٹی نے مصر سے زخمیوں کو نکالنے کےلیے ایمبولینسز بھیجنے کی اپیل کی ہے۔
فلسطینی اتھارٹی نے رفح میں یواین کیمپ پر صیہونی حملے کی شدید الفاظ میں مذمت کرتے ہوئے کہا کہ صیہونی حملہ عالمی عدالت انصاف کے فیصلے کیخلاف کھلا چیلنج ہے۔
صیہونی حکومت کا دعویٰ ہے کہ صیہونی طیاروں نے رات رفح میں حماس کے ایک کمپاؤنڈ پر حملہ کیا، حملےکے مقام پر حماس کے اہم ارکان ٹھہرے ہوئے تھے تاہم حملے سے دو روز پہلے ہی عالمی عدالت نے صیہونی حکومت کو رفح میں فوجی کارروائی سے روکا تھا۔
دوسری جانب امریکی رکن کانگریس نے مطالبہ کیا ہے کہ صیہونی وزیراعظم نیتن یاہو کو فوری طور پر رفح میں فوجی کارروائی روکنی چاہیے جبکہ صیہونی قانون ساز ایڈا توما سلیمان نے بھی رفح پر تازہ ترین حملے کی مذمت کرتے ہوئے کہا کہ عالمی عدالت انصاف کے فیصلےکو پامال کیا جا رہا ہے۔
صیہونی قانون ساز کا کہنا تھا صیہونی حکومت عالمی ٹربیونل کے تمام احکامات ماننے سے انکاری ہے، صیہونی حکومت پاگل پن، انتقامی کارروائیوں کو نئی مجرمانہ سطح پر لےجا رہی ہے۔
اقوا م متحدہ کی امدادی ایجنسی برائے فلسطین انروا کے بیان میں کہا گیا ہے کہ صیہونی حکومت کا یو این کیمپ کو نشانہ بنانا حیران کن نہیں، صیہونی حکومت ایک عام ریاست کے طور پر کام نہیں کر رہا، صیہونی حکومت انروا کے متعدد اسکولوں پر بمباری کر رہا ہے، صیہونی حکومت انروا کے صحت مراکز، پناہ گاہوں پر بھی بمباری کر چکا ہے، صیہونی بمباری میں اقوام متحدہ کے 193 کارکن مارے جا چکے ہیں۔
واضح رہے کہ غزہ میں صیہونی حملوں میں اب تک 36 ہزار فلسطینی شہید ہوچکے ہیں۔