امریکا میں تعینات پاکستانی سفیر مسعود خان نے کہا ہے کہ پاکستان چین اور امریکا کے درمیان اقتصادی پل کا کردار ادا کر سکتا ہے، پاکستان اور امریکا سمیت تمام سرکردہ اقوام کا مشترکہ ہدف خطے میں امن اور سلامتی ہے، بھارت کی ترجیح بھی پُر امن پڑوس کی ہونی چاہیے۔
مسعود خان نے کہا کہ امریکا چین دوستانہ تعلقات کی فضا جاری رہنے سے دونوں ممالک اور دنیاکو فائدہ ہوگا جبکہ پاکستان اس سلسلے میں دونوں ممالک کے درمیان اقتصادی پل کا کردار ادا کر سکتا ہے، پاک امریکا اقتصادی شراکت داری جامع ہے اور ہم اپنے تعلقات کو اقتصادی اور دفاعی میدانوں میں استعمال کرنا چاہتے ہیں۔
ایک سوال کے جواب میں مسعود خان کا کہنا تھا قرضوں کے جال سے نکلنےکے لیے ہمارے پاس متحرک مالیاتی نظام ہونا چاہیے۔ ان کا یہ بھی کہنا تھا کہ موسمیاتی تبدیلی پوری دنیاکے لیےخطرہ بن چکی ہے۔