ایران کی جانب سے کہا گیا ہے کہ حزب اللہ کے ساتھ جنگ میں صیہونی حکومت کو شکست کا سامنا کرنا پڑے گا۔
غیر ملکی میڈیا کے مطابق لبنان میں صیہونی حکومت کے بڑھتے ہوئے حملوں کے پیش نظر ایران نے اپنے بیان میں کہا کہ لبنان کی مسلح تنظیم حزب اللہ اپنا اور لبنان کا دفاع کرنے کی پوری صلاحیت رکھتی ہے۔
اس کے ساتھ ہی ایران نے صیہونی ریاست کو خبردار کرتے ہوئے کہا کہ حزب اللہ کے ساتھ جنگ میں صیہونی حکومت کو شکست کا سامنا کرنا پڑے گا۔
اقوام متحدہ میں ایران کے مشن نے کہا کہ قابض صیہونی حکومت کا خود کو بچانے کے لیے کوئی بھی غلط فیصلہ خطے کو ایک نئی جنگ میں جھونک سکتا ہے، جس کا نتیجہ لبنان کے بنیادی ڈھانچے کی تباہی کے ساتھ1948 میں وجود میں آنے والی ناجائز صیہونی ریاست کی تباہی کی صورت میں نکلے گا۔
واضح رہے رواں ہفتے لبنان کی تنظیم حزب اللہ نے صیہونی حکومت کی اہم حساس تنصیبات کی ڈرون ویڈیو جاری کی تھی جس کے بعد صیہونی وزیر خارجہ نے حزب اللہ کو بھرپور جنگ کی دھمکی دیتے ہوئے کہا تھا کہ ہم اس لمحے کے بہت قریب ہیں جب ہم حزب اللہ اور لبنان کے بارے میں کھیل کو تبدیل کرنے کا فیصلہ کر دیں گے اور جنگ کے نتیجے میں حزب اللہ تباہ ہو جائے گی اور لبنان کو سخت چوٹ لگے گی۔
صیہونی وزیر خارجہ کی دھمکی کا بھرپور جواب دیتے ہوئے حزب اللہ کے سیکرٹری جنرل حسن نصر اللہ نے کہا تھا کہ صیہونی حکومت نے لبنان پر بڑا حملہ کیا تو حزب اللہ ایسی کھلی جنگ سے جواب دے گی جس کی کوئی حد مقرر نہیں ہوگی۔
اس کے ساتھ ہی حسن نصر اللہ نے یورپی ملک قبرص کو بھی خبردار کیا تھا کہ صیہونی حکومت کے لیے اڈے کھولے تو وہ بھی حزب اللہ کا نشانہ ہوگا۔