صدر فیڈریشن آف پاکستان چیمبر آف کامرس اینڈ انڈسٹری عاطف اکرام شیخ نے مطالبہ کیا ہے کہ آئی پی پیز کے ساتھ ہونے والے معاہدوں پر نظر ثانی ضروری ہے،بجلی کی قیمتیں کم نہ ہوئیں تو ملک کی صنعتیں بند ہو جائیں گی۔
حکومت آئی پی پیز کے ساتھ ہونے والے معاہدوں کو عوام کے سامنے لیکر آئے، بجلی کے مہنگے بلز کی وجہ آئی پی پیز کے ساتھ کئے گئے معاہدے ہیں، ایسے آئی پی پیز کو ماہانہ 150 ارب روپے کی ادائیگی ہورہی ہے جو کم بجلی پیدا کرتی ہیں۔
ایک طرف گردشی قرض بڑھ رہا ہے تو دوسری طرف عوام پر بوجھ ڈالا جارہا ہے، آئی پی پیز کے پاور پلانٹس 10 فیصد سے بھی کم استعداد پر چل رہے اور حکومت پوری ادائیگی کررہی ہے۔
صدر ایف پی سی سی آئی نے کہا کہ پاکستان میں عام عوام کا جینا اور کاروباری حالات مخدوش ہورہے ہیں، بجلی کی قیمتیں کم نہ ہوئیں تو ملک کی صنعتیں بند ہو جائیں گی، پاکستان میں پہلے بجلی کی فی یونٹ قیمت خطے کے دیگر ممالک سے زیادہ تھی۔