پاکستان کا ویسٹ انڈیز کیخلاف سیریز ملتوی کرنے کا امکان

اسلام آباد(شوریٰ نیوز)پاکستان کا ویسٹ انڈیز کیخلاف سیریز ملتوی کرنے کا امکان، پی ایس ایل کے باعث ویسٹ انڈیز کے خلاف سیریز ملتوی ہو سکتی ہے،پاکستان کو فروری میں ویسٹ انڈیز کی ہوم سیریز میں میزبانی کرنی ہے جس میں 2 ٹیسٹ اور 3 ٹی ٹوئنٹی میچز شامل ہیں۔ ویسٹ انڈیز کے خلاف سیریز پاکستان سپر لیگ کے نویں ایڈیشن سے متصادم ہے، پی ایس ایل کے لیے ونڈو 12فروری سے 10 مارچ رکھی گئی ہے۔ سیریز پی ایس ایل سے متصادم ہونے پر پی سی بی نے مختلف آپشنز پر غور کیا ہے اور یہ ہوم سیریز رمضان کے بعد اپریل کے وسط میں شروع کرنے پر بھی غور کیا گیا ہے۔ پی ایس ایل کی ونڈو کے لیے پی سی بی نے اسٹیک ہولڈرز سے مشاورت کی ہے۔ پی سی بی نے آئی ایل ٹی 20 کے شیڈول کے لیے ایمریٹس کرکٹ بورڈ سے بھی رابطہ کر کے لیگ شیڈول سے 10 روز پہلے شروع کرنے کی درخواست کی ہے۔ پی سی بی آئی ایل ٹی ٹوئنٹی کے لیے اپنے کھلاڑیوں کو اجازت دینے کا ارادہ رکھتا ہے۔