نوجوانوں، خواتین اور کسانوں کی ترقی کیلئے انقلابی پروگرام

اسلام آباد(شوریٰ نیوز) نوجوانوں، خواتین اور کسانوں کی ترقی کے انقلابی پروگرام، بجٹ میں نوجوانوں، خواتین اور زرعی ٹیوب ویلز سے متعلق خصوصی منصوبوں کے لیے رقم مختص کردی گئی تفصیلات کے مطابق وزیراعظم شہباز شریف نے نوجوانوں، خواتین اور کسانوں کی ترقی کے انقلابی پروگرام کو بجٹ میں شامل کرنے کی منظوری دے دی۔ بجٹ 2023-24ء میں نوجوانوں، خواتین اور زرعی ٹیوب ویلز سے متعلق خصوصی منصوبوں کے لیے رقم مختص کی گئی ہے جس کے تحت نوجوانوں کو بلاسود قرض ملیں گے، تعلیم، اسپورٹس انڈاؤمنٹ فنڈ بنائے جائیں گے۔پنجاب انڈاؤمنٹ فنڈ کی طرز پر ’’پاکستان انڈاؤمنٹ فنڈ برائے تعلیم‘‘ قائم کرنے کی بھی منظوری دی گئی ہے، اس فنڈ سے ملک بھر کے ذہین لیکن غریب طلباء وطالبات کو وظائف دئیے جائیں گے۔نوجوانوں کو چھوٹے قرض دینے کے وزیراعظم یوتھ پروگرام کے لیے خطیر رقم مختص کی گئی ہے، نوجوانوں کو آئی ٹی سمیت مختلف ہنر سکھانے کے لیے وسائل بجٹ میں رکھے گئے ہیں، نوجوانوں کو ایک لاکھ مفت لیپ ٹاپ کی فراہمی کے لیے رقم بھی بجٹ میں مختص کی گئی ہے۔اسی طرح آئی ٹی کے شعبے میں نیا کاروبار شروع کرنے والے نوجوانوں کی مالی مدد کی جائے گی، نوجوانوں کو کھیل کے میدان میں لانے اور اسپورٹس سرگرمیوں کی حوصلہ افزائی کے لیے فنڈز مختص کر دئیے گئے۔وزیراعظم کی جانب سے خواتین کو مالی طور پر بااختیار بنانے کے پروگرام کے لیے بھی پروگرام کی منظوری دی گئی ہے۔زراعت کے شعبے میں زرعی ٹیوب ویلز کی شمسی توانائی پر منتقلی پروگرام کی بھی منظوری دی گئی ہے، زرعی ٹیوب ویلز کی شمسی توانائی پر منتقلی وزیراعظم کے کسان پیکیج کے دوسرے حصے کے طور پر کی جائے گی۔