روسی نائب وزیراعظم الیکسی اوورچک نے کہا ہےکہ ہمارا علم اور تجربہ پاکستان کے لیےکارآمد ہوسکتا ہے۔
دورہ پاکستان پر آئے روسی نائب وزیراعظم نے نجی نیوز چینل سے خصوصی گفتگو میں کہا کہ ان کے دورہ پاکستان کا مقصد مختلف شعبوں میں روس کے علم اور تجربات سے پاکستان کو فائدہ پہنچانا ہے، دورہ پاکستان کے دوران روس اور پاکستان کے مابین عوامی سطح پر روابط کا فروغ ، سماجی،ثقافتی اور اقتصادی تعلقات کی وسعت اور فروغ پر تبادلہ خیال کرنا ہے۔
انہوں نے کہا کہ گزشتہ برس روس پاکستان تجارتی حجم ایک اعشاریہ ایک ارب ڈالر رہا جو بہت کم ہے، ہم پاکستان کے ان اقدامات کا خیرمقدم کرتے ہیں جن کا مقصد شنگھائی تعاون تنظیم کے رکن ممالک میں پائیدار تجارتی ترقی کو یقینی بنانا ہے۔
روسی نائب وزیر اعظم نے مزید کہا کہ انہیں امید ہے پاکستان اور بھارت مسائل کا سفارتی حل نکالیں گے۔