لاپتا جانور کی تلاش کیلئے ایپلی کیشن تیار کرلی گئی

اسلام آباد (شوریٰ نیوز)لاپتا جانور کی تلاش کیلئے ایپلی کیشن تیار کرلی گئی ،جانوروں کی تلاش کیلئے ایپ کو آسانی سے استعمال کیا جاسکتا ہے ، ایک طرف جہاں ملک کے مختلف شہروں میں قربانی کے جانوروں کی چوری کے واقعات میں اضافہ ہو رہا ہے تو اسی دوران دو نوجوان سافٹ ویئر انجینئرز نے انوکھی ایپلی کیشن تیار کی ہے جو پالتو جانوروں اور قربانی کے جانوروں کی رجسٹریشن اور شناخت کو ممکن بنائے گی۔ نیشنل یونیورسٹی آف کمپیوٹر اینڈ ایمرجنگ سائنسز (فاسٹ) کے دو انجینئر سید عمید احمد اور محمد حسن خان نے یہ ایپلی کیشن تیار کی ہے۔اس ایپلی کیشن کا نام ’اینیمل پاسپورٹ‘ ہے جو بالخصوص عید الاضحٰی کے دوران قربانی کے جانوروں کو محفوظ رکھنے میں مددگار ثابت ہو گی۔ عمید اور حسن نے کہا کہ ایپلی کیشن کے ذریعے کسی جانور کی جسمانی خصوصیات کی بنیاد پر بائیو میٹرک سسٹم کے ذریعے لاپتا یا چوری شدہ جانوروں کو تلاش کرنا آسان ہو جائے گا۔ اس ایپلی کیشن کو استعمال کرنا نہایت آسان ہے، پہلے مرحلے میں اس کی رجسٹریشن کرنا ہوگی اور دوسرے مرحلے میں تصدیق کرنا ہوگی، رجسٹریشن کے لیے جانور کی تصویر ایپلی کیشن میں اپلوڈ کرنا ہوگی۔ انسانوں کے فنگر پرنٹ کی طرح تمام جانوروں کے چہرے کی بناوٹ مختلف ہوتی ہیں۔ ایپلی کیشن میں جانور کی تصویر کے ساتھ مالک کی تفصیلات موجود ہوں گی اور اگر جانور چوری ہونے کے بعد فروخت ہوگیا ہے تو خریدار ایپلی کیشن سے تصدیق کرسکتا ہے کہ وہ جانور چوری شدہ ہے یا نہیں، ایپلی کیشن کے ذریعے جانور کے اصل مالک کے بارے میں بھی معلوم ہوسکے گا۔پی ایچ ڈی کے امیدوار سید عمید نے بتایا کہ انہیں اس ایپ کا خیال اس وقت آیا جب ان کا اپنا جانور چوری ہو گیا تھا، جس کے بعد ان کے پروفیسر نے ایپلی کیشن بنانے میں ان کی رہنمائی کی۔ انہوں نے ایپلی کیشن میں تقریباً 5 ہزار جانوروں کے چہرے رجسٹرڈ کرکے اس کا تجربہ کیا ہے اور 99.9 فیصد مثبت نتائج سامنے آئے ہیں