لاہور(شوریٰ نیوز)پی ٹی آئی کارکنوں کے خلاف پنجاب میں کریک ڈاؤن پھر شروع،پولیس افسران کو کارکنوں کی گرفتاری کیلئے نئی فہرستیں فراہم کردی گئیں،پنجاب میں پاکستان تحریک انصاف کے کارکنوں کے خلاف ایک بار پھر کریک ڈاؤن کا آغاز کردیا گیا ہے۔صوبے بھر میں پی ٹی آئی کارکنوں کی گرفتاری کے لیے پولیس افسران کو نئی فہرستیں فراہم کردی گئی ہیں۔ ذرائع کے مطابق کریک ڈاؤن کا فیصلہ پی ٹی آئی رہنما شاہ محمود قریشی کے بیان کے بعد کیا گیا ہے۔واضح رہے کہ شاہ محمود قریشی کی جانب سے کارکنوں کو یوم آزادی بھرپور انداز میں منانے کا کہا گیا تھا۔ جس کے بعد پنجاب بھر میں کریک ڈاؤن شروع کردیا گیا ہے۔ پولیس افسران کو ہدایت کی گئی ہے کہ پی ٹی آئی پارٹی پرچم کسی مقام پر نظر نہ آئے۔ پی ٹی آئی کارکنوں کو 9 مئی کے واقعات میں حراست میں لیا جارہا ہے ۔ اس سلسلے میں پولیس نے گزشتہ شب بھی 100 سے زائد مقامات پر چھاپے مارے اور مطلوبہ شخص نہ ملنے پر قریبی عزیز و اقارب کو تھانے لے جایا گیا ہے۔ بیشتر زیر حراست افراد کو تصدیق کے بعد شخصی ضمانت پر رہائی ملی ہے۔