لاہور (شوریٰ نیوز) وزیر اطلاعات و بلدیات پنجاب عامر میر کی ہدایت پر محکمہ لوکل گورنمنٹ میں نا اہل اور بدعنوان عناصر کے خلاف کارروائیاں تیز تر کر دی گئی ہیں۔ سیکرٹری محکمہ بلدیات ڈاکٹر ارشاد کی نگرانی میں نااہل اور بدعنوان ملازمین کی لسٹیں تیار کرنا شروع کر دی گئی ہیں۔ایسی ہی شکایات کے نتیجے میں 2 زونل آفیسرز اور 7 بلڈنگ انسپیکٹرز کو پلاننگ ونگ سے بے دخل کر دیا گیا ہے۔ بے دخل کیے جانے والے افسران کی خدمات فوری طور پر میونسپل کارپوریشن کے سپرد کر دی گئیں ہیں۔ محکمہ بلدیات کی پلاننگ ونگ سے بے دخل کیے گئے افسران میں علامہ اقبال زون کی اسسٹنٹ زونل آفیسر سمیرا چوہان اور واہگہ زون کی زونل آفیسر ارم الطاف شامل ہیں۔ دونوں خواتین افسران پلاننگ ونگ میں گریڈ 17 میں خدمات سر انجام دے رہی تھیں جبکہ سمیرا چوہان کو علامہ اقبال زون کے علاوہ نشتر زون کا اضافی چارج بھی دیا گیا تھا۔ پلاننگ ونگ سے بے دخل کیے جانے والے 7 بلڈنگ انسپکٹر واہگہ زون، نشتر زون، شالیمار زون اور عزیز بھٹی شہید زون میں خدمات سر انجام دے رہے تھے۔ واہگہ زون کے بلڈنگ انسپکٹرز علی شاہد اور ارسلان جمیل اور نشتر زون کے طارق سعید اور عصمت اللہ کی خدمات میونسپل کارپوریشن کے سپرد کر دی گئیں ہیں جبکہ شالامار زون کے بلڈنگ انسپکٹرز احسن رضا اور علی رضا کو بھی پلاننگ وونگ چھوڑ کر میونسپل کارپوریشن میں رپورٹ کرنے کے احکامات جاری کر دئیے گئے ہیں۔ عزیز بھٹی زون کے بلڈنگ انسپکٹر محمد یاسین کی خدمات بھی میونسپل کارپوریشن کے سپرد کر دی گئیں ہیں۔ پلاننگ ونگ سے بے دخل کیے جانے والے یہ تمام افسران غیر قانونی تعمیرات اور دیگر غیر قانونی کاروائیوں میں ملوث پائے گئے تھے۔ صوبائی وزیر بلدیات عامر میر کے مطابق محکمہ بلدیات میں نا اہل اور راشی افسران کے خلاف کاروائیوں کا مقصد غیر قانونی تعمیرات روکنا اور کرپٹ مافیا کی حوصلہ شکنی کرنا ہے۔ ان کا کہنا تھا کہ بد عنوان اور ناقص کارکردگی کے حامل افسران کی بے دخلی محکمہ بلدیات کی کارکردگی کو بہتر بنائے گی۔ عامر میر نے کہا کہ پنجاب میں نگران حکومت کی یہ کوشش ہے کہ مختصر دورانیے میں سرکاری اداروں سے کرپشن کے خاتمہ کو یقینی بنایا جائے۔