انسداد دہشت گردی عدالت نے 26 نومبر احتجاج مقدمات میں بانی پی ٹی آئی عمران خان کی اہلیہ بشریٰ بی بی کی عبوری ضمانت میں 20 مئی تک توسیع کر دی۔
اے ٹی سی راولپنڈی کے جج امجد علی شاہ نے بشریٰ بی بی کی 26 نومبر احتجاج کے 29 مقدمات میں عبوری ضمانت کی درخواستوں پر سماعت کی، سماعت کے موقع پر تمام تفتیشی افسران موجود تھے۔
دوران سماعت پراسیکیوٹر سید ظہیر شاہ نے استغاثہ کی جانب سے ریکارڈ پیش کیا۔
بشریٰ بی بی کے وکیل فیصل ملک کی جانب سے تمام مقدمات میں شامل تفتیش کرنے کی درخواست کی گئی۔
وکیل صفائی نے استدعا کی کہ ملزمہ کو ان کے شوہر اور قانونی ٹیم کی موجودگی میں شامل تفتیش کیا جائے، جج امجد علی شاہ نے شامل تفتیش کرنے سے متعلق استدعا منظور کر لی۔
عدالت نے حکم دیتے ہوئے کہا کہ ملزمہ کو شوہر بانی پی ٹی آئی عمران خان اور قانونی ٹیم کی موجودگی میں شامل تفتیش کیا جائے۔