وزیراطلاعات عطاء اللّٰہ تارڑ اور ڈائریکٹر جنرل انٹر سروسز پبلک ریلیشنز لیفٹیننٹ جنرل احمد شریف چوہدری نے پاک بھارت صورتحال پر سیاسی رہنماؤں کو بریفنگ دیتے ہوئے دشمن کی کسی بھی جارحیت کا منہ توڑ جواب دینے کے عزم کا اعادہ کیا ہے۔
اتوار کو وفاقی وزیراطلاعات عطا اللہ تارڑ اور ڈی جی آئی ایس پی آر نے پاک بھارت صورتحال پر سیاسی رہنماؤں کو بریفنگ دی۔
اجلاس میں مسلم لیگ ن، پیپلزپارٹی،ایم کیو ایم ، جے یوآئی،سابق وزیراعظم آزاد کشمیر ، بلوچستان عوامی پارٹی سمیت دیگر رہنماؤں نے شرکت کی۔
البتہ تحریک انصاف نے پاک بھارت صورتحال پر حکومتی بریفنگ میں شرکت نہ کرنے کا فیصلہ کیا۔
ذرائع کے مطابق ان کیمرا سیشن میں ڈی جی آئی ایس پی آر نے سیاسی رہنماؤں کو پاک فوج کی تیاریوں سے جبکہ وزیر اطلاعات نے سیاسی قائدین کو حکومتی سفارتی اقدامات سے آگاہ کیا۔
جارحیت مسلط کی گئی تو دشمن کو منہ توڑ جواب دینے کیلئے تیار ہیں: ڈی جی آئی ایس پی آر
ڈی جی آئی ایس پی آر ڈی جی آئی ایس پی آر لیفٹننٹ جنرل احمد شریف چوہدری نے کہا کہ جارحیت مسلط کی گئی تو دشمن کو منہ توڑ جواب دینے کے لیے تیار ہیں۔
ڈی جی آئی ایس پی آر کا کہنا تھا کہ پاکستان پرامن ملک ہے اور خطے میں امن چاہتا ہے۔
بھارتی جنگی جارحیت کیخلاف قومی اسمبلی میں قرارداد لانے کا فیصلہ
بریفنگ میں پہلگام واقعے اور بھارتی جنگی جارحیت کے خلاف قومی اسمبلی میں قرارداد لانے کا فیصلہ کیا گیا۔
ذرائع کے مطابق متفقہ قرارداد آج شام قومی اسمبلی کے اجلاس میں لائی جائے گی، اجلاس میں ارکان اس اہم ترین ایشو پر اظہار خیال بھی کریں گے۔
ذرائع کا کہنا ہے کہ بھارتی جارحیت اور ریاستی سرپرستی میں کراس بارڈر ٹیررازم پر کھل کر بات کی جائے گی اور حکومت کی طرف سے قومی بیانیہ اور پالیسی بھی وضع کی جائے گی۔ جبکہ سندھ طاس معاہدے کی خلاف ورزی پر حکومت اپنی حکمت عملی سے بھی آگاہ کرے گی۔
وزیر مملکت داخلہ طلال چوہدری کی گفتگو
وزیر اطلاعات اور ڈی جی آئی ایس پی آر کی بریفنگ میں شرکت کے بعد وزیر مملکت داخلہ طلال چوہدری نے جیو نیوز سے گفتگو میں کہا کہ اجلاس کے شرکا کو پہلگام فالس فلیگ آپریشن کی بھارتی منصوبہ بندی سےآگاہ کیا گیا۔
طلال چوہدری نے بتایا کہ بریفنگ میں تمام سیاسی جماعتوں کو آگاہی ملی کہ کیسے پلان بنا کر یہ واقعہ کیا گیا، مودی پاکستان اور مسلمان دشمنی کے ذریعے سیاسی فوائد حاصل کرنا چاہتا ہے۔
مودی کے بیانیے پر دنیا نے اعتبار نہیں کیا: طلال چوہدری
وزیر مملکت داخلہ طلال چوہدری نے کہا کہ بھارت کا مقصد سندھ طاس معاہدے کو بھی ہدف بنانا تھا ،مگر اس بار مودی کے بیانیے پر دنیا نے آنکھیں بند کر کے اعتبار نہیں کیا، پا کستان کے مؤقف کی جیت ہوئی ہے۔
ان کا کہنا تھا کہ پاکستان کے سوشل میڈیا اور میڈیا نے بہترین انداز سے بھارتی بیانیے کو شکست دی، پاکستان نے کلیئر میسج دے دیا ہے کہ ہم تیار ہیں۔
وزیر مملکت داخلہ طلال چوہدری نے مزید کہا کہ بھارت جہاں کہیں بھی کچھ کرے گا تو اس کو دگنا جواب دیا جائے گا، بھارت کے اس عمل کی قیمت دنیا کو چکانی پڑ سکتی ہے۔
واضح رہے کہ 22 اپریل کو مقبوضہ کشمیر کے علاقے پہلگام میں 26 بھارتی سیاحوں کے قتل کے بعد پاکستان اور بھارت کے درمیان تناؤ بڑھ گیا ہے۔