ڈائریکٹر جنرل انٹر سروسز پبلک ریلیشنز ( ڈی جی آئی ایس پی آر) لیفٹیننٹ جنرل احمد شریف چوہدری نے بھارت کی جانب سے بزدلانہ حملے میں 8 پاکستانیوں کی شہادت اور 35 کے زخمی ہونے کی تصدیق کی ہے۔
رات گئے پریس بریفنگ میں ڈی جی آئی ایس پی آر نے بتایا کہ بزدل بھارت نے پاکستان پر بلااشتعال جارحیت کی، پاکستان میں 6 مقامات پر مختلف ہتھیاروں سے بھارت کی جانب سے 24 حملے ہوئے۔
ڈی جی آئی ایس پی آر نے بتایا کہ بزدل بھارت نے پاکستان پر بلااشتعال جارحیت کرکے معصوم لوگوں کو ٹارگٹ کیا، بھارت کے بزدلانہ حملوں میں 8 پاکستانی شہید،35 زخمی ہوئے جبکہ 2 افراد لاپتہ ہیں۔
دشمن نے کوٹلی، احمدپور شرقیہ، مظفرآباد، باغ اور مریدکے میں حملے کیے:ترجمان پاک فوج
ڈی جی آئی ایس پی آر کے مطابق احمدپورشرقیہ میں مسجد سبحان پر 4 حملے ہوئے جس میں 5 پاکستانی شہید ہوئے، احمدپورشرقیہ میں شہید ہونے والوں میں 3سالہ معصوم بچی بھی شامل ہے جبکہ 6 خواتین سمیت 31 پاکستانی زخمی بھی ہوئے۔
ڈی جی آئی ایس پی آر نے بتایا کہ احمدپورشرقیہ میں 1 مسجد شہید ہوئی، سول آبادی کے 4 فیملی کوارٹرز کو نقصان پہنچا۔
ڈی جی آئی ایس پی آر لیفٹیننٹ جنرل احمد شریف چوہدری نے بتایا کہ مظفرآباد میں شاہی والی کے مقام پر 7 حملے ہوئے، مسجد بلال کو نشانہ بنایا گیا، ایک بچی زخمی اور ایک مسجد شہید ہوئی۔
کوٹلی میں بھی ایک مسجد کو نشانہ بنایا گیا،2 افراد شہید ہوئے: ڈی جی آئی ایس پی آر
ڈی جی آئی ایس پی آر کے مطابق کوٹلی میں بھی ایک مسجد کو نشانہ بنایا گیااور وہاں 2 افراد شہید ہوئےجس میں 16 سال کی لڑکی اور 18 سال کا لڑکا شامل ہیں جبکہ ماں بیٹی زخمی ہیں۔
ڈی جی آئی ایس پی آر لیفٹیننٹ جنرل احمد شریف چوہدری نے بتایا کہ مرید کے میں بھی ایک مسجد کو نشانہ بنایا گیا،4 حملے کیے گئے جس میں 1شخص شہید 1زخمی جبکہ 2 افراد لاپتہ ہیں اور مسجد بھی شہید ہوئی، رہائشی کوآرٹرز کو نقصان ہوا۔
اس کے علاوہ سیالکوٹ کے شمال میں گاؤں کوٹلی لوہاراں میں 2حملے ہوئے جس میں کوئی نقصان نہیں ہوا۔سیالکوٹ میں ایک گولہ بغیر پھٹے گرا،دوسرا کھلے مقام پر گرا۔
ڈی جی آئی ایس پی آر کے مطابق شکرگڑھ میں 2 حملے ہوئے اور ایک ڈسپنسری کو معمولی نقصان پہنچا۔
ڈی جی آئی ایس پی آر کا کہنا تھا کہ دشمن کے بلاجواز حملہ کا پاکستانی فوج بھر پور جواب دے رہی ہے، آج دن میں تمام میڈیا کو ان مقامات پر لے جایا جائے گاتاکہ بھارت کی ننگی جارحیت کو ساری دنیا دیکھے۔
پاکستان کا بھارتی جارحیت کا بھرپور جواب، پاک فضائیہ نے 5 بھارتی طیارے مار گرائے
پاکستان کی جانب سے بھارت کے بزدلانہ حملے کا بھرپور جواب دیا جارہا ہے اور پاک فضائیہ نے دشمن کے 5 جہاز مار گرائے جب کہ بھارتی فوج کا بریگیڈ ہیڈ کوارٹر بھی تباہ کردیا۔