بھارتی کی جانب سے آزاد کشمیر اور پاکستان میں ہونے والے بزدلانہ حملے کے بعد لاہور، اسلام آباد اور سیالکوٹ سمیت دیگر جہگوں سے آنے والی پروازوں کو کراچی ائیر پورٹ پر لینڈ کرایا جا رہا ہے۔
ذرائع کے مطابق بھارتی میزائل حملوں کے بعد پاکستان کی فضائی حدود میں موجود پروازوں کا رخ تبدیل کر دیا گیا ہے تاہم بھارتی حملے کے بعد کراچی کی فضائی حدود کمرشل پروازوں کیلئے کھلی ہے۔
جدہ سے اسلام آباد جانے والی سعودی ائیرلائن کی پرواز ، جدہ سے لاہور جانے والی سعودی عرب کی پرواز اور ابوظبی سے نئی دہلی جانے والی اتحاد ائیر ویز کی پرواز (جو پاکستانی فضائی حدود میں تھی) اس کا رخ بھی کراچی کی جانب موڑ دیا گیا۔
ترجمان سیالکوٹ انٹرنیشنل ائیرپورٹ کے مطابق موجودہ ملکی سلامتی صورتحال کے پیش نظر اور حکومت پاکستان کے احکامات کے مطابق سیالکوٹ انٹرنیشنل ائیرپورٹ کو اگلے نوٹس تک تمام فلائٹ آپریشنز کے لیے عارضی طور پر بند کر دیا گیا ہے۔
ذرائع سی اے اے کے مطابق پاکستان کے ائیرپورٹس پر فضائی آپریشن معطل کردیا گیا ہے اور تاحکم ثانی لاہور اور اسلام آباد سمیت دیگر ائیرپورٹس پر فضائی آپریشن معطل ہے۔
دوسری جانب قومی ائیرلائن کی آج کی تمام پروازوں کو منسوخ کر دیا گیا ہے، نجی فضائی کمپنیوں نے بھی آج کراچی سے آپریٹ ہونے والی تمام پروازیں منسوخ کردی ہیں۔