پاکستان نے بجلی کی اجارہ داری ختم کر تے ہوئے مسابقتی منڈی پر نظریں جما لیں جبکہ عالمی بینک نے اصلاحات کی حمایت میں 55 ملین ڈالرز کی نئی فنڈنگ کا اعلان کر دیا۔
تفصیلات کے مطابق وفاقی وزیر برائے توانائی سردار اویس احمد خان لغاری نے ورلڈ بینک کے منیجنگ ڈائریکٹر آف آپریشنز، انا بیجرڈے کی قیادت میں ایک اعلیٰ سطحی وفد کے ساتھ ملاقات کے دوران بتایا کہ پاکستان جلد ہی مسابقتی بجلی منڈی کھول دیے گا جس سے بجلی کی خریداری میں حکومت کی واحد اجارہ داری ختم ہو جائے گی۔
وفاقہ وزیر نے کہا کہ بجلی کی منڈی کی منتقلی کیلئے تیاری کا کام تکمیل کے قریب ہے، اور انہوں نے مارکیٹ آپریشنز کی نگرانی کے لیے ایک خودمختار ادارے، ’’انڈیپنڈنٹ سسٹم اینڈ مارکیٹ آپریٹر‘‘ کے قیام کو اجاگر کیا۔
انہوں نے مزید کہا کہ نظام کی شفافیت اور کارکردگی کو یقینی بنانے کیلئے تجربہ کار ماہرین کو شامل کیا جا رہا ہے۔
اویس لغاری نے اہم اصلاحات پر زور دیا، جن میں محصولات کی بہتر وصولی اور یہ یقینی بنانے کی کوششیں شامل ہیں کہ سبسڈی صرف مستحق ترین صارفین تک ہی پہنچے۔
انہوں نے ہدفی سبسڈی کے نظام کے لیے عالمی بینک کی حمایت طلب کی جسے اینا بیئرڈ نے سراہا اور پاکستان کے توانائی کے شعبے کو جدید بنانے میں تعاون جاری رکھنے کے بینک کے عزم کا اعادہ کیا۔
تقریباً 7000 میگا واٹ بجلی کے اضافی ذخیرے کے ساتھ وفاقی وزیر اویس لغاری نے تجویز دی کہ صنعتوں کو بجلی معمولی نرخوں پر فراہم کی جائے، اور دعویٰ کیا کہ یہ خطے میں صنعتی شعبے کیلئے سب سے سستی بجلی ہوگی۔