ستمبر ، اکتوبر اور نومبر میں کراچی کے صارفین پر ایک اور بجلی بم گرایا جائے گا،کراچی کے شہریوں پر 4روپے 45 پیسے تک سہ ماہی ایڈجسٹمنٹ عائد کرنے کی دوسری درخواست بھی دائر کی گئی
وفاقی حکومت نے کراچی کے شہریوں کے لیے بجلی مہنگی کرنے کی پالیسی گائیڈ لائنز نیپرا کو بھجوا دیں جس میں کہا گیا کہ 2022-23 کی دوسری سہ ماہی کے لیے 46 پیسے فی یونٹ اضافہ کیا جائے۔
پورے ملک میں بجلی کا ٹیرف یکساں رکھنے کے لیے کے الیکٹرک کے بنیادی ٹیئر میں اضافہ کیا جائے،نیپرا وفاقی حکومت کی درخواست پر 11 ستمبر کو سماعت کرے گی۔
دوسری درخواست میں کہا گیا کہ کے الیکٹرک کے صارفین سے 1 روپے 48 پیسے سے لے کر 4 روپے 45 پیسے کی ایڈجسمنٹ بھی وصول کرنے کی اجازت دی جائے، جو ٹیرف ریشنلائزیشن سرچارج کی مد میں وصول کی جائے گی۔
درخواست میں مزید کہا گیا کہ نیپرا یکساں قیمتوں کے لیے کے الیکٹرک کا الگ شیڈول آف ٹیرف جاری کرے، ڈسکوز کی طرح چوتھی سہ ماہی ایڈجسمنٹ کو کے الیکٹرک کے صارفین پر لاگو کیا جائے۔